ULANGENG 21 - KITTA KAREBA MADECENG

Parakara abbunowang iya dé'é nariyullé pettui

¹ “Rékko ri wanuwa iya nawéréngngékko Puwang Allataalamu engka tau rilolongeng maté riyuno ri dare'é sibawa dé' narisseng niga mpunoi,

² pamimping sibawa hakimmu harusu'i lao suke'i pallawangenna polé ri onronna iyaro ujué rilolongeng lao ri tungke'-tungke' kota iya macawé'é.

³ Nainappa sining tomariyolona kota iya kaminang macawé'é harusu'i pilé sikaju saping lolo iya dé'éppa naengka naripaké mappallaung.

⁴ Iyaro sapingngé harusu'i natiwi mennang riséddié onrong ri seddéna salo iya dé'é naengka namarakko sibawa iya dé'éppa naengka narirakkala tanana iyaré'ga ritanengi. Harusu'i mennang napolo ellonna iyaro olokolo'é kuwaro.

⁵ Sining imang Léwié harusu towi lao kuwaro, nasaba harusu'i mennang mabbéré apettung ri laleng tungke' parakara tindakang ateddekengngé. Ripiléi mennang ri Puwang Allataalamu untu' massompa ri Aléna sibawa teppui barakka'é ri laleng asen-Na.

⁶ Nainappa sining tomariyolo polé ri kota iya kaminang macawé'é harusu'i nabissai limanna mennang ri yasé'na iyaro sapingngé

⁷ sibawa powadai, ‘Tenniya idi mpunoi iyaro tauwé, sibawa dé' taissengngi niga pogau'i.

⁸ Puwang, addampengengngi Israélié umma'-Mu iya Mupaleppe'é polé ri Maséré. Addampengekki sibawa aja' muwangga'ki mattanggung jawa ri abbunowanna tau iya dé'é napasala.’

⁹ Na ri laleng pogau'i aga iya natuntu'é Puwangnge, dé'na nariyangga'ko mattanggung jawa ri abbunowangngéro.”

Peraturanna makkunrai iya ripancajiyé tawangeng musu

¹⁰ “Rékko mammusuko, nanawérékko Puwang Allataalamu apakalang, namuwala tawangeng musu,

¹¹ naullé ri yelle'na mennang engka séddi makkunrai magello iya mupojiyé sibawa macinnako pubainéi.

¹² Tiwii iyaro makkunraié ri bolamu. Harusu'i goncingngi gemme'na kuwaro, tobba'i kanukunna,

¹³ sibawa mappasullé pakéyang. Harusu'i monro ri bolamu sibawa mabbarata nasaba amaténna tomatowanna siuleng ittana. Purairo weddinno kawing sibawa aléna.

¹⁴ Rékko rimunri dé'na muwacinnaini, weddikko suroi lao sibawa laluwasa. Dé' nawedding mugaukeng selaku ata iyaré'ga mubalu, nasaba purai mupassa siatinrokko.”

Peraturanna passalenna manana ana' macowaé

¹⁵ “Ebara'na séddié tau mappunnaiwi duwa bainé, na jajiyang duwai ana' worowané, iyakiya ana' iya jajiyé lebbi riyolo tenniya ana' polé ri bainé iya naéloriyé.

¹⁶ Rékko iyaro tauwé maéloi pattentui pékkugiwi maélo tawai asugirenna lao ri ana'-ana'na, dé' nawedding mappasilaingeng polé ri ana' bainéna iya naéloriyé sibawa mpéréngngi iyaro ana'é tawa iya mancajiyé ha'na ana' macowaé.

¹⁷ Harusu'i nawéréng tawa leppi wékkaduwa polé ri waramparanna lao ri ana' worowané macowaé, namuni iyaro ana'é tenniya ana' polé ri bainé iya naéloriyé. Ha'na ana' macowaé harusu'i nangakui ambo'na, sibawa lao ri ana'éro harusu'i riwéréng mana iya mancajiyé ha'na situru hukkungngé.”

Peraturanna passalenna ana' madorakaé

¹⁸ “Ebara'na engka ana' iya matedde atié, napoji maronta sibawa dé' namaélo tunru' lao ri tomatowanna namuni purani mennang nahukkung.

¹⁹ Harusu'i tomatowanna natiwi lao risining tomariyolona kotaé onronna mennang monro sibawa méllauwi kuwammengngi iyaro ana'é riadélékiwi.

²⁰ Harusu'i mennang makkeda lao risining tomariyolona kotaéro, ‘Iyaé ana'ta matedde atiwi, napoji maronta sibawa dé' namaélo tunru' lao ri idi; nallabowangngi dowié sibawa napoji mabo'.’

²¹ Nainappa sining tau worowané polé ri kotaéro harusu'i genrungngi iyaro ana'é sibawa batu narapi maté. Nanallalengiro mupallennye'i iyaro jaé. Sininna tau Israélié méngkalingai matu passalenna kajajiyangngéro namancaji métau.”

Maddupa-rupang peraturang

²² “Rékko séddié tau purani rihukkung maté nasaba séuwa ja, sibawa ujuna rigattung ri allirié,

²³ iyaro ujué dé' nawedding rileppessang kuwaro puppu benni, iyakiya harusu'i rikuburu ri essoéttoro. Uju iya taggattungngé ri allirié napapoléi pahukkungenna Allataala ri wanuwaé. Jaji, kuburu'i iyaro ujué kuwammengngi dé' mucarépaiwi wanuwa iya nawéréngngékko Puwang Allataalamu.