ULANGENG 2 - KITTA KAREBA MADECENG

¹ Angkanna lisuki ri padang kessi'é lalo ri laleng mattujué ri Séppang Akaba, pada-pada iya napparéntangngé Puwangnge. Maittaki sollé ri daéra buluna Edom.

² Namakkeda Puwangnge lao ri iyya

³ makkedaé genne'ni ittana sollé ri daéraéro. Jaji harusu'ki lao ri manorang.

⁴ Nainappa nasuroka Puwangnge mabbéréyangngi iyaé sining panunju'é lao ri iko, ‘Dé'na mumaitta mumattama matu ri wanuwa Edom, daérana saudara-saudaramu, wija-wijanna Esau. Métaui matu mennang ri iko,

⁵ iyakiya dé' naweddikko gasai mennang, saba' polé ri tanana mennang muwi céddé dé'to umaélo mpérékko, nasaba daéra Edom purani uwéréng wija-wijanna Esau.

⁶ Weddikko melli inanré sibawa énungeng polé ri mennang.’

⁷ Engngerangngi pékkugi Puwang Allataalamu pura barakkakiko ri laleng sininna iya mupogau'é. Napiyaroko ri wettu sollému ri padang kessi iya malowangngéwé. Nalinrungiko patappulo taung ittana sibawa nawérékko sininna iya muwapparelluwangngé.

⁸ Nainappa joppaki matteru, salaiwi laleng iya lalowé ri kota-kota Elat sibawa Ezion-Géber mattuju ri Tasi Maté, nainappa bélo' lilau manorang mattuju ri padang kessi Moab.

⁹ Makkedai Puwangnge lao ri iyya, ‘Tau Moab-é, wijanna Lot, dé' nawedding muganggu. Aja'to muwagagai mennang. Wanuwa Ar purani Uwéréngngi mennang sibawa polé ri tanana mennang muwi céddé dé'to Uwérékko.’ ” (

¹⁰ Riyolo Ar naonroiwi tau Emingngé. Battowa watakkaléna mennang, pada-pada tau Enak-é, bangsa rassasato.

¹¹ Pada-pada tau Enak-é, riteppu towi mennang tau Réfaim iyakiya tau Moab-é masengngi mennang tau Emim.

¹² Riyolo tau Horié monroi ri Edom, iyakiya ripaddésu'i sibawa ripaccappui ri wija-wijanna Esau, iya rimonri tudangiwi tanana mennang; makkuwatoro bangsa Israélié rimunri paddésu'i sining balinna polé ri tana iya nabbéréyangngé Puwangnge lao ri mennang.)

¹³ “Nainappaki malléttoiwi Salo Zéréd pada-pada iya napparéntangngé Puwangnge lao ri idi.

¹⁴ Iyaro kajajiyangngi telluppulo aruwa taung risalainnana Kadés-Barnéa. Sininna prajuri sippangka'éro maténi pada-pada iya napowadaé Puwangnge.

¹⁵ Matteru-terui Puwangnge méwai mennang angkanna binasa maneng.

¹⁶ Maté manennana mennang,

¹⁷ makkedai Puwangnge lao ri idi,

¹⁸ ‘Iyaé essoé muwolai daéra Moab, lalo ri wanuwa Ar.

¹⁹ Namulettu ri seddéna tanana tau Amongngé, wija-wijanna Lot. Aja' muganggui iyaré'ga gasai mennang, saba' polé ri tana iya puraé Uwéréngngi mennang, muwi céddé dé'to gaga iya maéloé Uwérékko.’ ” (

²⁰ Iyaro daéraé tarompo towi selaku wanuwa Refaim, asenna bangsa iya monroé riyolo kuwaro; tau Amongngé nasengngi mennang tau Zamzumim.

²¹ Pada-pada tau Enak-é, battowato mennang watakkaléna. Mawatang senna mennang, sibawa maéga jumellana. Iyakiya Puwangnge paccappui mennang, angkanna tau Amongngé sittaiwi tanaéro, nainappa monro kuwaro.

²² Makkuwatoro napogau' Puwangnge untu' tau Edongngé, wija-wijanna Esau, iya monroiyéngngi daéra buluna Edom. Puwangnge paccappui tau Horié, angkanna tau Edongngé sittaiwi iyaro tanaé sibawa tudangiwi nainappa mattette kuwaro lettu makkekkuwangngé.

²³ Tana mattuttung wiring Tasi Tengngaé natudangiwi sining tau polé ri pulo Kréta. Napaccappui mennang tau Awié, pabbanuwa tulénna tanaéro, nainappa tudangiwi daéraéro lettu ri yattang sibbéla kota Gaza.)

²⁴ “Ri liwenna daéra Moab, makkedai Puwangnge lao ri idi, ‘Laono makkekkuwangngé malléttoiwi Salo Arnon. Maéloka mabbéréyangngi lao ri iko Sihon, arunna Amorié iya mapparéntaé ri Hésybon, silaong sibawa wanuwanna. Gasai, nainappa, tudangiwi tanana.

²⁵ Mappammulai essoéwé maélo-Ka mébbuko riyétauri ri bangsa-bangsaé kégi-kégi. Tungke' tau ténréi matu nataro tau rékko naéngkalingai passalemmu!’ ”

Nacauna Israélié Arung Sihon

²⁶ “Nainappa kirikka siyagangngaré suro polé ri padang kessi Kedémot lao ri Arung Sihon polé ri Hésybon untu' palettu tangnga assidaméngengngéwé:

²⁷ ‘Palaloki molai wanuwanna Puwakku. Maéloki lalo matteru sibawa dé' taléssé polé ri watattanaé.

²⁸ Maéloki wajai inanré iya riyanré sibawa uwai iya riyénungngé. Banna parelluki molai wanuwaéwé,

²⁹ narapiki malléttoiwi Salo Yordan untu' muttama ri wanuwa iya nabbéréyangngé Puwang Allataalata lao ri idi. Wija-wijanna Esau iya monroé ri Edom sibawa tau Moab iya monroé ri Ar pura toni napalaloki molai daérana mennang.’

³⁰ Iyakiya Arung Sihon dé' napalaloki molai wanuwannaro. Puwang Allataalamu mébbui matedde ati sibawa maccuwa-cuwaiwi abalaé kuwammengngi riyulléi caui. Daérana ritudangi mupi lettu makkekkuwangngé.

³¹ Nainappa makkeda Puwangnge lao ri iyya, ‘Arung Sihon sibawa wanuwanna Uwabbéréyangngi lao ri iko; alani sibawa tudangiwi wanuwaéro.’

³² Napoléna Sihon sibawa sininna pasukanna untu' musuki ri seddéna kota Yahas.

³³ Iyakiya nabbéréyangngi Puwang Allataalata lao ri idi, naricauna silaong ana'-ana'na enrengngé sininna tentarana.

³⁴ Iyatoro wettué narisittai sibawa riancuru tungke' kotana, sibawa mpunoi sininna pabbanuwana, worowané, makkunrai sibawa ana'-ana'. Dé' gaga rileppessang tuwo.

³⁵ Riyalai olokolo'na mennang sibawa rirampasa'i kota-kotana.

³⁶ Nasibawang pattulunna Puwang Allataalata, riyulléi sittai manengngi kota-kotaéro, mappammulai ri Aroér, ri cappa'na Lompo Arnon, sibawa kotaé ri tengngana lompo'éro, lettu ri daéra Giléad. Dé' gaga kota iya mawatangngé témbo'na lao ri idi.

³⁷ Iyakiya dé' taddeppériwi daérana tau Amongngé iyaré'ga wirinna Salo Yabok iyaré'ga kota-kotaé ri daéra bulué iyaré'ga kégi-kégi onrong laingngé iya nattéyangngé Puwang Allataalata.”