ULANGENG 18 - KITTA KAREBA MADECENG

Tawana sining imangngé

¹ “Sininna suku Léwié riwéréng tugas imang, rimakkuwannanaro dé' nawedding tarima attawang tana ri Israélié. Harusu'i mennang tuwo polé risining pakkasuwiyangngé sibawa sining akkarobangeng laingngé iya riyabbéréyangngé lao ri Puwangnge.

² Dé' nawedding mennang mappunnai tana pada-pada suku-suku laingngé, saba' Puwangnge ritu attawang manana mennang, pada-pada iya najjanciyangngé Puwangnge lao ri mennang.

³ Rékko séddié tau makkasuwiyangeng akkarobangeng saping iyaré'ga bimbala, limanna, banginna sibawa lise' babuwana iyaro olokolo'é harusu'i riyabbéréyang lao ri imang-ngimangngé untu' tawana mennang.

⁴ Wassélé mammulangngé polé ri gandongngé, uwai anggoro'é, minnya zaitungngé sibawa bulu bimbala'é, untu' attawannato mennang.

⁵ Polé risininna suku Israélié, Puwang Allataalamu pura piléi suku Léwié mancaji imang untu' mannennungeng.

⁶ Rékko séddié tau Léwi iya assalennaé muwi polé ri kota kégi ri Israélié lao ri onrong iya napilé Puwangnge namaéloi monro kuwaro,

⁷ weddingngi natumaningi Puwang Allataalamu selaku imang pada-pada sining tau Léwi laingngé iya majjamaé ri onrongngéro.

⁸ Harusu'i tarima inanré iya padaé égana pada-pada imang-ngimang laingngé; aga iya nalolongengngé polé ri kaluwargana, makkuwatoro untu' aléna.”

Pangkaukeng-pangkaukeng iya riyattéyangngé

⁹ “Rékko muttama'no ri wanuwa iya nawéréngngékko Puwang Allataalamu, aja' muturui ja iya napogau'é bangsa-bangsa iya engkaé kuwaro.

¹⁰ Ri yelle'mu aja' naengka makkasuwiyangengngi ana'-ana'na selaku akkarobangeng ritunu. Sibawa aja' namuwi séddi tau mancaji pattiro-tiro, sappa tanra-tanrang, paké baca-baca iyaré'ga

¹¹ paddissengeng, iyaré'ga sisumpung sibawa waliyalana tau maté.

¹² Tau iya pogau'éngngi sining pangkaukeng majaéro ribenciwi ri Puwang Allataalamu, na iyanaro saba'na iyaro bangsa-bangsaé ripaddésu'i polé ri yolomu.

¹³ Jaji sitinajako mattumani lao ri Puwang Allataalamu sibawa sukku atimmu.”

Majjanciwi Allataala untu' suro séddi nabi

¹⁴ Nainappa makkeda Musa, “Bangsa-bangsa ri wanuwa iya maéloé muwonroiro naccowériwi pangajana pattiro-tiroé sibawa sappaé tanra-tanrang. Iyakiya Puwang Allataalamu dé' napalaloko pogau'i gau'éro.

¹⁵ Sibalé'na polé ri bangsata muto maéloi suro lao ri iko séddi nabi pada-pada iyya'é, na harusu'ko mapato lao ri aléna.

¹⁶ Ri esso maddeppungemmu ri Bulu Sinai, muwéllauwi kuwammengngi aja'na muwéngkalingai Puwang Allataalamu mabbicara sibawa aja'na muwitai ahadéréken-Na ri laleng api iya malluwa-luwa'é, nasaba métauko maté.

¹⁷ Rimakkuwannanaro makkedai Puwangnge lao ri iyya, ‘Paréllaunna mennanro mapanréi.

¹⁸ Polé ri bangsana muto mennang maélo-Ka suro lao ri mennang séddi nabi pada-pada iko. Maélo-Ka powadangngi aga iya harusu'é napowada, nainappa napalettu matu lao ri bangsaéro sininna iya Uwapparéntangngé.

¹⁹ Mabbicarai matu ri laleng asek-Ku, na-Uhukkungngi matu nigi-nigi iya dé'é namaélo méngkalingai.

²⁰ Iyakiya rékko séddié nabi barani palettu séuwa paseng ri laleng asek-Ku padahal dé' Usuroi pogau'i makkuwaéro, harusu'i maté; makkuwatoro tungke' nabi iya mabbicaraé ri laleng asenna déwata-déwata laingngé harusu'i maté.’

²¹ Naullé makkutanako ri laleng ati, ‘Pékkugiki missengngi aga pasenna iyaro séddié nabi assalenna poléi ri Puwangnge iyaré'ga dé'?’

²² Rékko séddié nabi mabbicarai ri laleng asenna Puwangnge, iyakiya aga iya napowadaéro dé' nakajajiyang, iyaro botoé dé' napolé ri Puwangnge. Iyaro nabié mabbicarai ri laleng asenna muto nadé' naweddikko métau ri aléna.”