ULANGENG 17 - KITTA KAREBA MADECENG

¹ Aja' muwakkasuwiyangeng saping iyaré'ga bimbala iya sala-salangngé lao ri Puwang Allataalamu, nasaba nacéccéi.

² Rékko muwéngkalingai makkedaé risala séddinna kotamu engka tau madosa lao ri Puwang Allataalamu nasaba najjalékkaiwi assijancingngé

³ sibawa parénta-Na ri laleng massompana nenniya mattumaninna lao ri déwata-déwata laingngé iyaré'ga lao ri mata essoé, kétengngé iyaré'ga sining wéttowingngé,

⁴ harusu'ko salidikiwi tonget-tongeng. Rékko iyaro jaé tonget-tongengngi kajajiyang ri Israélié,

⁵ tau iya pasalaé harusu'i ritiwi ri saliweng kota sibawa rigenrung batu gangka maté.

⁶ Iyakiya banna weddingngi rihukkung maté rékko engka duwa tau sabbi iyaré'ga lebbi; séddié tau dé' nawedding rihukkung maté rékko pappakatajang séddi tau sabbi bawang.

⁷ Sining sabbié harusu'i maggenrungengngi batu mammulangngé lao ri tauwéro, naccowériwi sininna ra'ya'é. Nanallalengiro mupallennye'i iyaro jaé.

⁸ Rékko engka parakara iya dé'é naulléi pettuiwi haking-hakingngé riséuwaé onrong nasaba mawatang senna, ébara'na parakara abbunowang iya nattungkaiyé iyaré'ga dé'é nattungkaiwi, assisalang passalenna waramparang iyaré'ga silo-lo watakkalé, harusu'ko lao ri onrong iya napilé Puwang Allataalamu.

⁹ Pangoloi iyaro parakaraé lao ri imang-ngimang Léwié sibawa lao ri haking iya nakennaé jamang, nainappa muleppessang mennang pettuiwi.

¹⁰ Mennang ritu mabbéré apettung, sibawa iko harusu pajoppai sibawa matutu aga iya napowadaé mennang lao ri iko.

¹¹ Tarimai apettunna mennang sibawa pogau'i aga napattette mennang lettu ri passaleng iya baiccu'é.

¹² Nigi-nigi barani méwai hakingngé iyaré'ga imang iya nakennaé jamang, harusu'i rihukkung maté; nanallalengiwiro mupallennye'i jaé ri Israélié.

¹³ Naéngkalingai matu sininna tauwé passalenna iyaro kajajiyangngé namancaji métau, angkanna dé'na gaga iya baranié pogau'i makkuwaéro.”

Peraturang-peraturang passalenna arungngé

¹⁴ “Rékko tana iya nawéréngngékko Puwang Allataalamu mancajini appunnangemmu, sibawa monrono kuwaro, naullé muwacinnaini séddi arung pada-pada bangsa-bangsa iya monroé ri mattulilimmu.

¹⁵ Pénessaiwi madécéd-décéng kuwammengngi tau iya muakkaé mancaji arummu iyanaritu tau iya napilé Puwang Allataalamu. Harusu'i séddi tau polé ri bangsamu muto; aja' muwakkai séddié tau laing mancaji arummu.

¹⁶ Dé' nawedding arungngé mappunnai maéga anyarang untu' tentarana sibawa dé' nawedding nasuro bangsaéwé lisu ri Maséré untu' melli anyarang, nasaba purai makkeda Puwangnge makkedaé dé' nawedding lisu umma'-Na ri wanuwaéro.

¹⁷ Dé' nawedding arungngé mappunnai maéga bainé, kuwammengngi aja' nabbokoriwi Puwangnge. Dé'to nawedding passugii aléna sibawa péra' enrengngé ulaweng.

¹⁸ Rékko séddié tau rilanti mancaji arung, harusu'i riwéréng séddi kitta iya mallise'é hukkung-hukkunna Allataala iya rilémbaé polé ri kitta asellinna iya nataroé imang-ngimang Léwié.

¹⁹ Iyaro kitta'é harusu'i tuli engka ri seddéna, gangka tuwona harusu'i nabaca kuwammengngi nagguru pakalebbii Puwang Allataalana sibawa matinulu turusiwi sininna parénta iya tarokié ri lalenna.

²⁰ Rékko nabacai sibawa mattunru-tunru, dé' matu naangga'i aléna lebbi makessing naiya sining tau sibangsana, sibawa dé' namaélo majjalékkaiwi paréntana Puwangnge sibawa cara muwi maga. Nainappa aléna sibawa wija-wijanna naparéntai matu bangsana narapi massossoreng.”