ULANGENG 16 - KITTA KAREBA MADECENG

Esso Maraja Paskaé

¹ “Ramé-raméiwi Paskaé ri laleng uleng Abib untu' pakalebbii Puwang Allataalamu, saba' ri laleng ulengngéro, ri wennié, Napaleppe'ko polé ri Maséré.

² Laono ri onrong iya napilé Puwangnge untu' géréi sikaju polé ri bémbé bimbala'mu iyaré'ga sapimmu selaku pakkasuwiyang Paska untu' pakalebbii Puwang Allataalamu.

³ Iyaro pakkasuwiyang Paskaé harusu'i riyanré sibawa roti iya dé'é raginna. Pitungngesso ittana harusu'ko manréi roti iya dé'é raginna, pada-pada wettunna musalai tana Maséré sibawa mapperi-peri. Anréi iyaro rotié, roti iya riteppué roti anrasa-rasang, kuwammengngi gangka tuwomu muwéngngerangngi matu esso musalainna Maséré, onrommu manrasa-rasa.

⁴ Pitungngesso ittana risininna wanuwammu dé' muwi séddi tau taro ragi ri bolana. Juku olokolo iya nagéréé ri wenni mammulangngé harusu'i riyanré gangka cappu ri wenniéttoro.

^5-6 Olokolo untu' Ramé-ramé Paskaé harusu'i rigéré ri onrong iya napilé Puwang Allataalamu sibawa dé' nawedding ri onrong laingngé risininna wanuwa iya Nawéréngngékko. Iyaro gau'éro harusu'i mupogau'i ri wettu labuna essoé, pada-pada wettummu salaiwi tana Maséré.

⁷ Séwongngi iyaro jukué sibawa anréi ri onrong iya napilé Puwang Allataalamu, nainappa lisuno ri bolamu pappa bajana éléé.

⁸ Enneng esso rappina harusu'ko manré roti dé'é raginna. Ri esso mapitué harusu'ko maddeppungeng untu' sompai Puwang Allataalamu. Aja' muwappallaung ri essoéro.”

Pésta Engngalangngé

⁹ “Bilangngi pitu aha' mappammulai ri esso pammulanna méngngalako gandong,

¹⁰ nainappa ramé-raméiwi Pésta Engngalangngé untu' pakalebbii Puwang Allataalamu. Iyaro essoé tiwii pakkasuwiyang cenning atié lao ri aléna situru égana dallé iya puraé nawérékko.

¹¹ Ri yolona Puwang Allataalamu, ri onrong iya Napilé, harusu'ko marennu silaong ana'-ana'mu, ata-atammu sibawa tau Léwié, tau laingngé, ana' béué sibawa sining janda iya monroé ri kota-kotamu.

¹² Turusiwi sininna parénta-Na sibawa matinulu, sibawa aja' muwallupaiwi makkedaé atako riyolo ri Maséré.”

Pésta Kalampang Daud-daungngé

¹³ “Puranana ripaddunu maneng gandommu sibawa puranana ripara' maneng buwa anggoro'mu, harusu'ko ramé-raméiwi Pésta Kalampang Daud-daungngé pitungngesso ittana.

¹⁴ Assennas-sennanno sibawa ana'-ana'mu, ata-atammu, tau Léwié, tau laingngé, ana' béué sibawa sining jandaé iya monroé ri kota-kotamu.

¹⁵ Pitungngesso ittana harusu'ko ramé-raméiwi iyaro péstaé untu' pakalebbii Puwang Allataalamu ri onrong assompang iya napilé Puwangnge. Arennuno, nasaba Puwang Allataalamu pura barakkaki wassélé tanamu sibawa pallaummu.

¹⁶ Sininna worowané Israélié harusu'i polé sompai Puwang Allataalamu ri onrong iya Napilé wékkatellu sitaung, iyanaritu ri Esso Maraja Paskaé, ri Pésta Engngalangngé sibawa Pésta Kalampang Daud-daungngé. Tungke' tau harusu'i tiwi pakkasuwiyang

¹⁷ situru amampungenna, situru égana dallé iya riwéréngngékko ri Puwang Allataalamu.”

Carana pajoppai adélékengngé

¹⁸ “Ri tungke' kota iya nawéréngngékko Puwang Allataalamu, harusu'ko makka haking-haking sibawa pajjama-jama laing untu' madélékiwi ra'ya'é sibawa adélé.

¹⁹ Ri laleng mala apettung, dé' nawedding mennang tinda' siélo-élona iyaré'ga matane siwali. Dé'to nawedding mennang tarima pasoso, nasaba iyaro pasoso'é dé' naébbui tauwé mapanré sibawa malempu, angkanna mala apettung iya dé'e naadélé.

²⁰ Harusu'ko tuli adélé, kuwammengngi mulléi mattette sibawa tuwo saléwangeng ri tana nawéréngngékko Puwang Allataalamu.

²¹ Rékko mébbuko mézba untu' Puwang Allataalamu, aja' mutaroiwi dato-dato barahala aju iya pulambangngéngngi Asyéra ri seddéna,

²² sibawa aja' mupatettong alliri untu' massompa barahala, nasaba nabenci Puwang Allataalamu pangkaukengngéro.