ULANGENG 14 - KITTA KAREBA MADECENG

Cara mabbarata iya riyattéyangngé

¹ “Iko iyanaritu umma'na Puwang Allataalamu. Jaji wettummu mabbarata untu' tau maté, aja' muloi alému iyaré'ga cukkuru'i bagiyang yolona ulummu pada-pada iya napogau'é bangsa-bangsa laingngé.

² Iko iyanaritu appunnangenna Puwang Allataalamu; polé ri sininna bangsa-bangsaé ri yasé'na linoé, iko iyanaritu iya napilé Allataala untu' mancaji umma'-Na.”

Olokolo iya harangngé sibawa hallala'é

³ “Aja' muwanréi olokolo iya napaharangngé Puwangnge.

⁴ Wedding muwanré iyaé olokolo'é: saping, bimbala, bémbé,

⁵ jonga, bimbala ale', bémbé ale',

⁶ sibawa sininna olokolo iya dé'é namapuwé kanukunna sibawa dé' namalléro.

⁷ Dé' nawedding manréko olokolo iya dé'é namapuwé kanukunna sibawa dé'é namalléro. Aja' muwanré unta, kalinci iyaré'ga marmot. Iyaro olokolo'é harang, nasaba namuni malléroi, dé' namapuwé kanukunna.

⁸ Aja' muwanré bawi. Iyaro olokolo'é harang nasaba namuni mapuwé'i kanukunna, dé' namalléro. Dé' nawedding riyanré jukuna, dé' nawedding rigéssa bakkéna.

⁹ Weddikko manréi sininna rupanna balé iya masséréé sibawa massessi'é.

¹⁰ Olokolo iya tuwoé ri laleng uwai iyakiya dé' namasséré sibawa dé' namassessi iyanaritu harangngi, jaji dé' nawedding riyanré.

¹¹ Weddikko manréi sininna rupanna manu'-manu' iya dé'é naharang.

^12-18 Iyakiya engka siyagangngaré rupanna manu'-manu' iya dé'é nawedding riyanré, iyanaritu: kuwajang, kacoci, sininna rupanna bokangngé, nasar, kaokao, manu'-manu' unta, camar, tampao sibawa sininna rupanna coko'é, bannya liya, manu'-manu' kasa sibawa panningngé.

¹⁹ Sininna serangga makképannié iyanaritu harangngi, jaji dé' nawedding riyanré.

²⁰ Olokolo makképannié iya dé'é naharang wedding riyanré.

²¹ Olokolo iya maté riyalé dé' nawedding muwanré, iyakiya wedding nanré tau laing iya monroé ri yelle'mu, iyaré'ga ribalu lao ri bangsa laingngé. Iko iyanaritu umma iya ripallaingngé untu' Puwang Allataalamu. Juku ana' bimbala iyaré'ga ana' bémbé'é dé' nawedding rinasu silaong uwai susunna indo'na.”

Peraturanna passalenna pakkasuwiyang tawaseppuloé

²² “Tungke' taung harusu'i mupallaing tawaseppulona polé ri wassélé tanamu.

²³ Ri yolona Puwang Allataalamu, ri onrong iya Napilé, untu' onrong massompa, harusu'ko manréi pakkasuwiyang tawaseppulomu polé ri gandongngé, uwai anggoro'é, minnya zaitungngé enrengngé ana' sapingngé sibawa bémbé bimbala'mu iya bunge' jajiyé. Pogau'i iyaro gau'é kuwammengngi untu' mannennungeng magguruko pakalebbii Puwang Allataalamu.

²⁴ Rékko onrong iya napilé Puwang Allataalamu, mabéla senna'i polé ri bolamu, angkanna tawaseppulona polé ri wassélé tanamu iya nawéréngngékko Puwang Allataalamu, dé' mulléi tiwii kuwaro, na

²⁵ balu'i iyaro bagiyang wassélé tanamu, namutiwii ellinna ri onrong iya napilé Puwang Allataalamu.

²⁶ Balancai iyaro dowié untu' agi-agi iya muwacinnaiyé – saping iyaré'ga bémbé bimbala, uwai anggoro iyaré'ga énungeng maseri – nainappa ri onrongngéro, ri yolona Puwang Allataalamu, iko sibawa kaluwargamu harusu'i sisama manréi sibawa massennas-sennang.

²⁷ Aja' muleppessangngi kariyariya tau Léwié iya monroé ri kota-kotamu; éngngerangngi makkedaé mennang ritu dé' nappunnai tana riyalé.

²⁸ Ri tungke' cappa taung matellué, harusu'ko tiwii tawaseppulona bagiyang polé ri wassélé tanamu sibawa paddeppungengngi ri kota-kotamu.

²⁹ Iyaro inanré untu' tau Léwié, nasaba dé' nappunnai mennang tana, na untu' taung laingngé, ana' béué sibawa sining jandaé iya tuwoé ri kota-kotamu. Weddingngi mennang polé sibawa malai sininna iya napparelluwangngé mennang. Rékko mupogau'i makkuwaéro, Puwang Allataalamu barakkakiwi sininna usahamu.”