ULANGENG 13 - KITTA KAREBA MADECENG

¹ Rékko séddié nabi iyaré'ga tukang nippi majjanciyangngi séuwaé iya makalallaingngé iyaré'ga dé'é padanna

² sibawa akkatta kuwammengngi mumassompa sibawa mattumani lao ri déwata-déwata iya dé'é naengka muwissengngi, muwi aga iya najjanciyangngéro tonget-tongengngi kajajiyang,

³ aja' mupuriyatiwi. Puwang Allataalamu pakéi iyaro tauwé untu' cobaiko, untu' mitai aga tonget-tongekko pojiwi Puwangnge sibawa sukku iyaré'ga dé'.

^4-5 Tau makkuwaéro harusu'i rihukkung maté, nasaba maéloi papusako polé ri laleng iya naparéntangngékko Puwang Allataalamu. Aléna iyanaritu tau maja nasaba nasuroko maronta lao ri Puwang Allataalamu iya paleppe'ékko polé ri Maséré, onrommu ripowata. Jaji harusu'i riyuno, kuwammengngi naripallennye iyaro jaé. Iyakiya iko sitinajako maccowériwi Puwang Allataalamu sibawa mupakalebbi-Na; turusiwi Aléna sibawa pogau'i sininna parénta-Na. Tette'no matinulu sibawa mattumani lao ri Aléna.

^6-7 Rékko silessuremmu iyaré'ga ana'mu worowané iyaré'ga makkunraié, iyaré'ga bainému iya mupojiyé, iyaré'ga sellaomu iya maréppé'é mammekko-mekkoi palécéko untu' massompa déwata-déwata laing iya dé'é muwissengngi sibawa dé'é naissengngi toriyolomu, déwata-déwata polé ri bangsa-bangsa iya macawé'é sibawa mabélaé monro,

⁸ aja' muwéngkalingai sibawa aja' muleppessangngi alému ripalécé ri aléna. Aja'to muwamaséiwi iyaré'ga linrungiwi tauwéro.

^9-10 Harusu'i rigenrung batu gangka maté. Iko harusu'i pammulaiwi genrungngi, naccowéri sininna ra'ya'é. Tau iya pasalaéro harusu'i riyuno, saba' maéloi pabélaiko polé ri Puwang Allataalamu iya paleppe'ékko polé ri angatangengngé ri Maséré.

¹¹ Na sininna bangsa Israélié naéngkalingai matu passalenna abbunowangngéro namétauna, angkanna dé' muwi séddi tau pogau'i maja makkuwaéro.

¹² Rékko matti monroko ri kota-kota iya nawéréngngékko Puwang Allataalamu, naullé tassiyai karébaé

¹³ makkedaé siyagangngaré tau maja polé ri bangsamu pura papusai pabbanuwana kotaé untu' massompa déwata-déwata iya dé'é muwissengngi.

¹⁴ Rékko riyéngkalingai karéba-karéba makkuwaéro, salidikiwi sibawa madécéd-décéng. Rékko iyaro jaé tonget-tongengngi pura kajajiyang,

¹⁵ sininna pabbanuwana kotaéro silaong olokolo'na harusu'i riyuno. Iyaro kotaé harusu'i riyancuru siseng.

¹⁶ Sininna waramparanna pabbanuwana kotaéro harusu'i ripaddeppungeng sibawa rigoppo ri tana lapangngé, nainappa kotaé sibawa sininna waramparanna harusu'i ritunu selaku akkarobangeng lao ri Puwang Allataalamu. Pura manennanaro harusu'i risalai mancaji ruttungeng sibawa dé' nawedding ripatettong paimeng.

¹⁷ Iyaro barab-barang tattanroé dé' nawedding ritaro untu' alému, iyakiya harusu'i riyancuru siseng. Nasoro matu caina Puwangnge nanappaitangngi paressé babuwana lao ri iko. Makacuwai matu lao ri iko sibawa pancajiko bangsa iya battowaé pada-pada iya Najjanciyangngé lao ri toriyolomu,

¹⁸ assaleng muturusiwi sininna parénta-Na iya upalettukengngékko essoéwé, sibawa pogau'i sininna iya Napuwéloé.”