ULANGENG 12 - KITTA KAREBA MADECENG

Séddi bawang onrong massompa

¹ “Iyanaé hukkung-hukkung iya harusu'é muturusi sillampé umuru'mu ri wanuwa iya Nawéréngngékko Puwangnge, Allataalana néné-nénému.

² Muttama'muna ri wanuwaéro harusu'ko mancuru'i onrong-ngonrong assompangngé ri tompo'na sining bulu matanré, ri bulu-bulué sibawa ri yawana ajukajung maworongngé, onronna bangsa iya monroé kuwaro sompai déwata-déwatana mennang.

³ Ruttungngi mézba-mézbana mennang sibawa ropo'i alliri-alliri batu iya naangga'é mennang makarame'. Tunui lambang-lambang Asyéraé, sibawa ancuru'i dato'-dato' barahalana mennang, angkanna iyaro déwata-déwataé dé'na narisompa matu paimeng ri onrong-ngonrongngéro.

⁴ Wettummu sompai Puwang Allataalamu, aja' muturusiwi carana sining tauwéro sompai déwata-déwatana mennang.

⁵ Polé risininna daérana suku-suku Israélié, Puwang Allataalamu pilé matu séddi onrong kuwammengngi iyaro bangsata weddingngi lao ri yolo-Na sibawa sompai Aléna.

⁶ Ri onrongngénnaro harusu'i mutiwi sining akkarobangeng ritunummu enrengngé sining akkarobangeng laingngé, pakkasuwiyang tawa seppulomu sibawa kappasuwiyang laingngé, akkarobangeng pappaleppe tinja'mu, akkarobangeng cenning atimmu sibawa ana' sapimmu nenniya bémbé bimbala'mu iya bunge' jajiyé.

⁷ Kuwatoniro, ri yolona Puwang Allataalamu, iko silaong kaluwargamu harusu manréi sibawa marennu nasaba usaha-usahamu iya papolé wassélé nasaba nabarakkakiwi Puwang Allataalamu.

⁸ Rékko poléni iyaro wettué, aja'na mupogau'i pada-pada makkekkuwangngé. Narapi makkekkuwangngé massompako siélo-élo atimmu,

⁹ nasaba dé'pa mumattama ri wanuwa iya nabbéréyangngé Puwang Allataalamu lao ri iko, onrommu wedding mattette sibawa amang.

¹⁰ Puramuna malléttoiwi Salo Yordan, Puwang Allataalamu tulukko matu tudangiwi sibawa monroiwi tana ri liweng saloéro. Nalinrungiko matu polé ri sininna balié, nenniya tuwoko matu sibawa amang enrengngé tennang.

¹¹ Nainappa piléi matu Puwang Allataalamu séddi onrong kégi wedding risompa. Kuwaniro harusu lao tiwii sininna iya puraé Uwapparéntang, iyanaritu akkarobangeng ritunué sibawa akkarobangeng-akkarobangeng laingngé, pakkasuwiyang tawaseppulomu sibawa pakkasuwiyang ripallaing iya muwajjanciyangngé lao ri Puwangnge.

¹² Arennuno ri yolona Puwang Allataalamu, silaong ana'-ana'mu, ata-atammu sibawa sining tau Léwié iya monroé ri kota-kotamu, nasaba tau Léwié dé' nalolongeng bagiyang tana ri wanuwammu.

¹³ Dé' nawedding muwakkasuwiyangeng akkarobammu ri sembarangang onrong iya mupilé riyalé,

¹⁴ iyakiya banna ri onrong iya napilé Puwangnge ri sala' séddinna sukummu. Kuwaro bawang harusu'ko makkasuwiyangeng akkarobangeng ritunu sibawa pogau'i gau' laing iya uparéntangngékko.

¹⁵ Iyakiya laluwasako géréi olokolo'mu sibawa manréi jukuna kégi-kégiko monro. Weddikko manréi singngéga iya nawéréngngékko Puwang Allataalamu. Tungke' tau, muwi iya mapaccingngé iyaré'ga najisi'é, weddingngi nanré iyaro jukué, pada-pada weddikko manré juku jonga.

¹⁶ Banna darana dé' nawedding riyanré, iyakiya harusu'i ritiri ri tanaé pada-pada uwai.

¹⁷ Ri onrong muwonroiyé dé' naweddikko manré pakkasuwiyang tawaseppulona gandommu, anggoro'mu, minnya zaitummu, sapimmu iyaré'ga bémbé bimbala'mu iya bunge' jajiyé, akkarobangeng pappaleppe tinja'mu, akkarobangeng cenning atimmu iyaré'ga pakkasuwiyang laingngé.

¹⁸ Iko sibawa ana'-ana'mu, silaong ata-atammu enrengngé sining tau Léwié iya monroé ri kotamu, harusu'i manréi pakkasuwiyangngéro ri yolona Puwang Allataalamu, ri onrong iya napilé Puwang Allataalamu. Na ri onrongngéro harusu'ko marennu nasaba sininna usahamu.

¹⁹ Jagaiwi aja' narapii muleppessangngi appang Léwié kariyariya ri wettu tuwomu mupa ri wanuwaéro.

²⁰ Puranana nalowangi Puwang Allataalamu pakkasésénna wanuwammu pada-pada iya Najjanciyangngé, weddikko manré juku siélo-élona atimmu.

²¹ Rékko onrong iya napilé Puwang Allataalamu mabéla senna polé ri onrommu, weddikko géré sikaju saping, bimbala iyaré'ga bémbé iya nawéréngngékko Puwangnge, sibawa manréi jukuna ri onrommu siélo-élo atimmu, pada-pada iya puraé upowadakko.

²² Tungke' tau, muwi iya mapaccingngé iyaré'ga najisi'é, wedding manréi iyaro jukué, pada-pada weddikko manréi juku jongaé.

²³ Iyakiya juku iya engkaé mupa darana dé' nawedding riyanré, nasaba nyawaé engkai ri laleng daraé, nadé' naweddikko manré nyawa silaong jukuna.

²⁴ Dé' sises-siseng nawedding riyanré daraé, iyakiya harusu'i ritiri ri tanaé pada-pada uwai.

²⁵ Rékko muturusiwi iyaro paréntaé, masennangngi matu Puwangnge, na iko sibawa wija-wijammu saléwangengngi matu.

²⁶ Sininna akkarobangngé sibawa pakkasuwiyangngé iya puraé muwajjanciyang lao ri Puwangnge, harusu'i mutiwi ri onrong iya napilé Puwangnge.

²⁷ Akkarobangeng ritunué sibawa akkarobangeng iya riyanré jukuna harusu'i riyakkasuwiyangeng ri yasé'na mézbana Puwang Allataalamu sibawa darana ritiri'i ri yasé'na mézbaéro.

²⁸ Pénessaiwi madécéd-décéng sininna iya puraé uparéntakko, namupogau'i iya makessingngé sibawa naéloriyé Puwang Allataalamu, angkanna iko sibawa wija-wijammu salama'i sibawa saléwangengngi untu' mannennungeng.”

Papparéngngerang lao ri assompang dato-dato barahalaé

²⁹ “Puwang Allataalamu paccappui matu bangsa-bangsa iya monroé ri wanuwaéro, angkanna muwulléi tudangiwi sibawa monroiwi.

³⁰ Puranana ripaccappu bangsa-bangsaéro, atike'ko aja' narapii muturu mennang sompa déwata-déwata laing, saba' iyaro pangkaukengngé papoléi abala.

³¹ Carana iyaro bangsa-bangsaé sompai déwata-déwatana mennang, aja' muturui untu' sompai Puwang Allataalamu, saba' massompai mennang sibawa pogau'i pangkaukeng-pangkaukeng majaé iya nabenciyé Puwangnge. Mala ana'-ana'na muto mennang natunu ri yasé'na mézbaé selaku akkarobangeng untu' déwata-déwatana mennang.

³² Pogau'ni sininna iya uparéntangngékko; aja' naritambai iyaré'ga narikurangi.