ULANGENG 10 - KITTA KAREBA MADECENG

Untu' mabbékkaduwanna Musa tarimai Seppulo Paréntana Allataala

¹ “Nainappa makkeda Puwangnge lao ri iyya, ‘Musa, pano duwallétta batu pada-pada mammulangngé, sibawa ébbu tokko séddi petti aju untu' onronna, nainappa laono ri onrokku ri tompo'na bulué.

² Ri batu-batuéro maéloka mokii ada-ada iya padaé pada-pada ri batu iya puraé mureppa; nainappa iyaro batu-batué harusu'i muputtama ri laleng pettiéro.’

³ Nauwébbuna petti polé ri aju akasiaé sibawa pa duwa batu pada-pada riyoloé sibawa tiwii ri tompo'na bulué.

⁴ Ri batuéro naokini Puwangnge Seppulo Parénta pada-pada iya mammulangngé, iyanaritu parénta-parénta iya Nawéréngngékko, wettun-Na mabbicara polé ri tengnga-tengngana apié ri esso maddeppungemmu ri ponna bulué. Purairo Nawérénna Puwangnge pépeng batuéro

⁵ naulisu nonnoriwi bulué. Nasituru sibawa paréntana Puwangnge, iya duwa batuéro uputtama'ni ri laleng petti iya puraé uwébbu – namappammulai wettuéro lettu makkekkuwangngé iya duwa pépeng batuéro engka mupi kuwaro.” (

⁶ Nainappa joppa tau Israélié polé risining bujunna tau Yaakangngé, sibawa lao ri Moséra. Kuwaniro Harun maté sibawa ritampung. Eléazar ana'na sulléiwi selaku imang.

⁷ Polé kuwaro laoni mennang ri Gudgod, nainappa matteru ri Yotbata, daéra iya maégaé uwaina.

⁸ Ri buluéro napallainni Puwangnge suku Léwié untu' murusu'i Petti Assijancingngé sibawa tumaningiwi Puwangnge, enrengngé powadai barakka'é ri laleng asen-Na. Iyanaro jamanna lettu makkekkuwangngé.

⁹ Iyanaro saba'na tau Léwié dé' natarima tana mana pada-pada suku laingngé, saba' Puwangnge ritu bagiyang manana mennang, pada-pada iya napowadaé Puwang Allataalamu lao ri mennang.)

¹⁰ “Patappulo esso sibawa patappulo wenni monroka ri tompo'na bulué pada-pada iya upogau'é bunge'-bunge'na. Siseppi naéngkalingaka Puwangnge, sibawa nasitujuiwi dé' napaccappuko.

¹¹ Nainappa Nasuroka lao untu' pimpikko kuwammengngi muwulléi mappunnaiwi tana iya Najjanciyangngé lao ri néné-nénému.”

Tuntutanna Puwangnge

¹² “Makkekkuwangngé, Saudara-saudara, puriyatini aga iya natuntu'é Puwang Allataalamu polé ri iko: Pakalebbii Puwang Allataalamu sibawa pogau'ni sininna parénta-Na. Eloriwi sibawa assompano ri Aléna sibawa sininna tubu nyawamu.

¹³ Turusini sininna paréntana Puwangnge iya upalettukengngékko essoéwé untu' adécéngeng ri alému.

¹⁴ Puwang Allataalamu mappunnaiwi langi kaminang matanré; muwi linoé appunnangennato lollong sininna iya engkaé ri tompo'na.

¹⁵ Iyakiya pammaséna Puwangnge lao ri toriyolomu makkuwamani rajanna, angkanna polé risininna bangsaé iko ritu Napilé, na muwi lettu makkekkuwangngé iko umma'-Na iya napilé.

¹⁶ Jaji mappammulai makkekkuwangngé harusu'ko mapato ri Puwangnge sibawa aja'na mumatedde atisi.

¹⁷ Puwang Allataalamu engkai ri yasé'na sininna déwataé sibawa nasau manengngi sininna akuwasangngé. Aléna Allataala iya marajaé sibawa makuwasa iya harusu'é riturusi. Dé' napojiwi kacowé-cowé sibawa dé'to natarima pasoso.

¹⁸ Nabélai ha'na ana' béué sibawa jandaé kuwammengngi narigaukeng mennang sibawa adélé; namaséiwi tau laingngé iya tuwoé silaong bangsata sibawa mpéréngngi mennang inanré sibawa pakéyang.

¹⁹ Na harusu tokko mappaitangngi pammasému lao risining tau laingngéro, saba' riyolo tau laing tokko ri Maséré.

²⁰ Pakalebbii Puwang Allataalamu sibawa massompa ri Aléna bawang. Sitinajako tette matinulu lao ri Aléna sibawa mattanro ri laleng asen-Na bawang.

²¹ Pojiwi nasaba Aléna Allataalamu. Mata ulummu pura mitai pangkaukeng-pangkaukeng héba'é sibawa maseroé iya napogaukengngékko.

²² Wettunna néné-nénému lao ri Maséré, jumellana mennang banna pituppulo tau. Iyakiya Puwang Allataalamu pura mébbui jumellamu singngéga wéttowing-wéttowingngé ri langié.”