ULANGENG 1 - KITTA KAREBA MADECENG

Ada-ada pappaddiyolo

¹ Iyaé kitta'é mallise'i ada-ada iya napalettu'é Musa lao ri bangsa Israélié wettunna mennang engka ri padang kessi'é ri Lompo Yordan. Iyaro lompo'é engkai ri seddé alauna Salo Yordan, seddéna kota Suf, pallawangenna kota Paran riséddié tibang, sibawa kota-kota Tofel, Laban, Hazerot sibawa Di-Zahab ri tibang laingngé. (

² Polé ri Bulu Sinai lettu ri Kadés-Barnéa naolai daéra buluna Edom, riyapparelluwangngi seppulo séddi essona mallaleng.)

³ Ri tanggala séddinna uleng seppulo séddi ri laleng taung mapatappuloé nasalainnana mennang Maséré, napalettu'ni Musa ri bangsaéro sininna iya napparéntangngé Puwangnge untu' ripowadangngi mennang.

⁴ Iyaro kajajiyangngi purana Musa nacau Sihon, arunna tau Amorié, iya mapparéntaé ri kota Hésybon, sibawa Og, arunna Basan, iya mapparéntaé ri kota-kota Asytarot sibawa Edréi.

⁵ Jaji ri seddé alauna Yordan ri daéra Moab, untu' bunge'-bunge'na Musa pakatajangngi hukkung-hukkungngé sibawa parénta-paréntana Puwangnge. Adanna Musa,

⁶ “Wettutta engka ri Bulu Sinai, makkedai Puwang Allataalata, ‘Genne'ni ittana monroko ri buluéwé.

⁷ Makkekkuwangngé bongkara'ni akkémammu namulao ri daéra buluna tau Amorié sibawa risininna daéra ri seddéna, iyanaritu Lompo Yordan, daéra mabbulu-bulué sibawa tanété mariyawaé, daéra ri seddé yattang sibawa wirinna Tasi Tengngaé. Laono mutudangiwi tana Kanaan sibawa Buluna Libanon lettu ri salo battowaé Efrat.

⁸ Iyya, Puwang, pura majjanciyangngi sininna daéraéro lao ri toriyolomu Abraham, Ishak sibawa Yakub enrengngé wija-wijanna mennang. Jaji laono tudangiwi tanaéro.’ ”

Musa makka haking-haking

⁹ Makkedai Musa lao ri bangsaéro, “Wettutta engka ri Bulu Sinai, makkedaka lao ri iko: Tanggung jawa untu' pimpikko matane senna lao ri iyya. Dé' uwulléi alé-aléku pogau'i, saba'

¹⁰ Puwang Allataalamu pura mébbui tattamba jumellana singngéga sining wéttowingngé ri langié.

¹¹ Tennapodo Puwang, Allataalana néné-nénému matterui tambaiwi jumellamu narapi leppi wékkasisebbu, sibawa pancajiko bangsa iya madécéngngé pada-pada iya puraé Najjanciyang!

¹² Iyakiya pékkugi makkullé alé-aléku mulléi méssangngi tanggung jawa iya matane'é untu' pacceppiwi sininna persoalammu?

¹³ Piléni polé ri tungke' suku siyagangngaré tau worowané iya mapanré, maégaé pengalamanna sibawa pennoé pappahang, kuwammengngi uwakkai mennang untu' pimpikko.

¹⁴ Iyaro tangngaé mutarimai sibawa makessing.

¹⁵ Rimakkuwannanaro ri yelle'na sining pamimping iya mupilé, siyagangngaré tau iya mapanré sibawa maégaé pengalamanna uwalai sibawa uwakkai untu' kapalaiko. Siyagangngaré ripancaji pamimping sisebbu tau, iya laingngé sératu tau, limappulo tau sibawa seppulo tau. Makka towi pamimping-pamimping laing untu' murusu'i suku-sukummu.

¹⁶ Iyaro wettué utugaskangngi mennang makkuwaé: Pénessaiwi sining assisalangngé iya mompoé ri yelle'na bangsamu. Wéréngngi apettung iya adélé'é, muwi ri laleng parakara iya kennaéngngi tau si bangsamu iyaré'ga kennaéngngi tau laing iya monroé ri yelle'mu.

¹⁷ Aja' namatane siwali apettummu; tungke' tau harusu'i madélékiwi sibawa cara iya padaé, temmappasilaingeng niga iyaro tauwé. Aja' mumétau muwi lao ri niga, saba' apettung iya muwalaé poléi ri Allataala. Rékko séddié parakara mawatang senna untu' alému, tiwii lao ri iyya, kuwammengngi iyya pettuiwi.

¹⁸ Iyaro wettué mabbéré tokka panunju-panunju lao ri iko passalenna sininna passaleng laingngé iya harusu'é mupogau'.”

Risurona mata-mataé polé ri Kadés-Barnéa

¹⁹ “Nainappa situru sibawa paréntana Puwang Allataala, risalaini Bulu Sinai natajoppa molai padang kessi iya malowangngé sibawa maseroé mattuju ri daéra buluna tau Amorié. Wettutta lettu ri Kadés-Barnéa,

^20-21 makkedaka: Makkekkuwangngé lettu'no ri daéra buluna tau Amorié, tana iya nabbéréyangngé Puwang Allataalata sibawa Allataalana néné-nénéta lao ri idi. Itai, mallebba'ni tanaéro ri yolomu. Laono untu' tudangiwi pada-pada iya napparéntangngé Puwangnge. Aja' mukaléwa-léwa iyaré'ga métau.

²² Iyakiya laoko ri iyya sibawa makkeda, ‘Lebbi kessing muwi suroi siyagangngaré tau untu' poddiyoloiki untu' salidikiwi iyaro wanuwaé kuwammengngi weddingngi napowada mennang lao ri idi kéga laleng iya harusu'é riyola sibawa pékkugiwi kota-kota iya maéloé rilaowi.’

²³ Usitujuiwi iyaro tangngaé, iyanaro saba'na upiléi seppulo duwa tau, séddi tau polé ri tungke' suku.

²⁴ Nauttamakiwi mennang iyaro daéra buluna sibbéla Lompo Eskol, nainappa najalajja.

²⁵ Nainappa lisu mennang ri idi tiwi buwa-buwa iya nalolongengngé mennang kuwaro sibawa laporo'i makkedaé wanuwa iya maéloé nabbéréyang Puwang Allataalataro macommo senna.

²⁶ Iyakiya muéwai paréntana Puwang Allataalamu, sibawa dé' mumaélo muttamakiwi wanuwaéro.

²⁷ Mannoko'-noko'ko makkuwaé, ‘Nabenciki Puwangnge. Mala natiwiki massu polé ri Maséré untu' mabbéréyakki ri laleng limanna tau Amorié kuwammengngi naunoki.

²⁸ Jaji untu' aga laoki kuwaro? Sining tau iya risuroé lao kuwaro mébbuki métau ri laleng nalaporo'na makkedaé iyaro bangsaé lebbi watangngi sibawa lebbi poréi naiya idi, sibawa monroi mennang ri kota-kota iya sittanré langié témbo'na. Mitai mennang rassasa kuwaro!’

²⁹ Iyakiya makkedaka: Aja' mumétau lao risining tauwéro.

³⁰ Puwang Allataalamu pimpikko matu sibawa mammusurekko pada-pada pura musabbingngé ri Maséré

³¹ sibawa ri padang kessi'é. Muwitai pékkugi Puwang Allataalamu tiwiko sibawa salama puppu lalengngéro lettu ri onrongngéwé, dé' assilaingenna séddié ambo' mépa'i ana'na.

³² Iyakiya namuni puraka makkeda makkuwaro, dé' topa mumaélo mateppe ri Puwang Allataalamu,

³³ iya joppaé ri yolomu untu' sapparekko onrong makkéma. Najellorekko laleng ri wennié sibawa alliri api, sibawa ri essoé ri laleng alliri ellung.”

Puwangnge hukkungngi Israélié

³⁴ “Naéngkalingai Puwangnge addarékémmu namacaina. Mattanroi,

³⁵ ‘Dé' muwi séddi tau polé ri sippangka majaéwé muttamakiwi matu wanuwa macommo'é iya Uwajjanciyangngé lao ri néné-nénému.

³⁶ Banna Kaléb, ana' Yéfune muttamakiwi matu, nasaba tette'i matinulu ri Iyya. Lao ri Kaléb sibawa wija-wijanna maélo-Ka wéréngngi wanuwa iya puraé najalajja'ro.’

³⁷ Muwassabari towi Puwangnge namacai lao ri iyya sibawa makkeda, ‘Musa, muwi iko dé'to mumattamakiwi matu wanuwaéro.

³⁸ Iyakiya pakkasse'i atinna pabbantummu, Yosua ana' Nun. Aléna ritu pimpingngi matu Israélié sittaiwi tanaéro.’

³⁹ Namakkeda Puwangnge lao ri idi maneng, ‘Ana'-ana'mu iya baiccu senna'é mupa untu' pasilaingengngi iya makessingngé sibawa iya majaé, ana'-ana' iya muwasengngé maélo rirampasa risining balimmu, lao ri mennang ritu Uwéréngngi matu iyaro tanaé, sibawa natudangiwi matu mennang.

⁴⁰ Iyakiya iko lisuno ri padang kessi'é lalo ri laleng iya mattujué ri Séppang Akaba.’

⁴¹ Mappébalino, ‘Musa, madosaki lao ri Puwangnge. Iyakiya makkekkuwangngé maéloki malluru mammusu pada-pada iya napparéntangngé Puwangnge, Allataalata.’ Nainappa tungke'-tungke' ri yelle'mu sadiyasadiya untu' mammusu, sibawa mangga'i makkedaé gasai iyaro daéra bulué soal gampang.

⁴² Iyakiya makkedai Puwangnge lao ri iyya, ‘Aja' muleppessangngi mennang mammusu, nasaba dé' umaélo sibawangngi mennang, ricaui matu ri balinna.’

⁴³ Upalettukekko aga napowada Puwangnge, iyakiya dé' mupaduliwi. Muéwai paréntana Puwangnge, sibawa nasibawang atempong laoko ri daéra buluéro.

⁴⁴ Nainappa tau Amori iya monroiyéngngi iyaro daéra bulué massu méwako. Jumellana mennang maéga senna, pada-pada wani makkonrongngé. Nalellukko mennang sibbéla Horma, nainappa nacauko ri daéra buluna Edom.

⁴⁵ Nainappako lisu sibawa mangobbi lao ri Puwangnge méllau tulung, iyakiya dé' namaélo méngkalingako iyaré'ga jampangiko.”

Mattaut-taung ri padang kessi'é

⁴⁶ “Purairo monroki ri Kadés maitta senna.