NEHEMIA 8 - KITTA KAREBA MADECENG

Nabacana Ezra Hukkungngé lao ri ra'ya'é

¹ Ri uleng mapitué mattette'ni tau Israélié ri kotana tungke'-tungke'. Ri tanggala séddinna ulengngéro maddeppungeng manenni mennang ri Yérusalém, ri seddéna ri yolona Pintu Gerbang Uwaié. Naéllauni mennang kuwammengngi nalai Ezra Kitta Hukkungngé, séddiwi tau acca ri laleng Hukkung iya nabbéréyangngé Puwangnge lao ri Israélié naolai Musa.

² Nanatiwini Ezra iyaro kitta'é ri yolona jema'é, worowané, makkunrai sibawa ana'-ana' iya balléré'énna untu' mappahang.

³ Nainappa, polé ri élé lettu lakesso, nabacani Ezra iyaro Hukkungngé lao ri mennang. Naéngkalinga manenni mennang sibawa puriyatiwi.

⁴ Tettonni Ezra ri mimbara ajué iya puraé riyébbu untu' apparelluwanna addéppungengngéro. Ri seddé ataunna tettongngi sining tauwéwé: Matica, Séma, Anaya, Uria, Hilkia sibawa Maaséya; na ri seddé abéyona tettongngi: Pédaya, Misaél, Malkia, Hasum, Hasbadana, Zakharia sibawa Mésulam.

⁵ Panggung naonroiyé Ezra tettonro lebbi tanré naiya sining tauwéro, angkanna naullé manengngi mennang mitai. Natimpa'na muwa kitta'éro, tettong manenni mennang.

⁶ Makkedani Ezra, “Pojiwi Puwangnge, Allataala iya battowaé!” Nakkani limanna ra'ya'é matanré-tanré sibawa mappébali, “Aming, aming!” Nainappa mennang suju' sompai Allataala.

⁷ Purairo tokkonni mennang sibawa tettong ri onronna tungke'-tungke', na siyagangngaré tau Léwi pakatajangngi Hukkungngéro lao ri mennang. Iyaro sining tau Léwié iyanaritu: Yésua, Bani, Sérébya, Yamin, Akub, Sabetai, Hodia, Maaséya, Kélita, Azarya, Yozabad, Hanan sibawa Pélaya.

⁸ Nalémbani mennang Hukkunna Allataalaro tassibagiyang-tassibagiyang enrengngé pakatajangngi angkanna naulléni pahangngi ra'ya'é iyaro ribacaé.

⁹ Naéngkalingana abbacangenna Hukkungngéro, messé senna'ni ra'ya'é, nainappa teri. Na gubernur Néhémia sibawa Imang Ezra ahli Hukkungngéro, enrengngé sining tau Léwi iya pakatajangngéngngi Hukkungngéro, powadai lao ri sininna ra'ya'é makkuwaé, “Iyaé essoé, esso ripallaing untu' Puwang Allataalamu, jaji aja' mumasara iyaré'ga teri.

¹⁰ Lisuno makkekkuwangngé; anréno sibawa énunno sibawa masennang. Abbéréyangngi sibagiyang polé ri inanrému sibawa anggoro'mu lao ri mennang iya akurangengngé. Iyaé essoé, esso ripallaing untu' Puwatta, jaji aja' mumasussa. Asennangeng nawéréngngékko Puwangnge péwatangiko matu.”

¹¹ Makkuwatoro sining tau Léwié pattennangngi ra'ya'é sibawa makkeda makkolik-koling, “Aja' mumessé ri esso iya ripallaingngéwé.”

¹² Nanalisuna sininna ra'ya'é untu' manré sibawa ménung enrengngé bagé-bagéi inanréna lao risining tau laingngé. Masennanni mennang nasaba napahanni bettuwanna ribacaé iya naéngkalingaéro mennang.

Pésta Kalampang Daud-daungngé

¹³ Pappa bajana maddeppungenni sininna kapala appangngé, sining imangngé sibawa sining tau Léwié, nainappa lao ri Ezra untu' magguruiwi sining pappagguruwang Hukkunna Puwangnge.

¹⁴ Nalolongenni mennang makkedaé ri laleng Hukkung iya nabbéréyangngé Puwangnge naolai Musa, Puwangnge suroi umma Israélié monro ri laleng kalampang-kalampangngé wettunna Pésta Kalampang Daud-daungngé.

¹⁵ Rimakkuwannanaro ri sininna Yérusalém ri kota-kotaé sibawa ri désa-désaé, nappallebbangengngi paréntaéwé, “Laono ri bulué sibawa mala takké-takké aju camara, zaitun, aju minnya, pattuku sibawa aju-kajung laingngé untu' mébbu kalampang situru sibawa peraturangngé ri laleng Kitta Hukkungngé.”

¹⁶ Nanalaona ra'ya'é malai takké-takkéro. Mébbu manenni mennang kalampang-kalampang risining pabbingeng iya malappaé ri tompo bolana mennang, ri seddé bolana, ri seddé yolona Bolana Puwangnge, ri lapangang seddéna Pintu Gerbang Uwai sibawa ri lapangang seddéna Pintu Gerbang Efraim.

¹⁷ Sininna ra'ya' iya lisuénna polé ri appalirengngéro naébbuni kalampang-kalampangngéro, nainappa monro kuwaro. Iyanaé bunge' pammulanna ripogau' gau'éro sipongenna Yosua ana' Nun, namasennang manenna sibawa mariyo-riyo.

¹⁸ Pitungngesso ittana mennang mappésta. Esso-esso nabaca Ezra bagiyab-bagiyanna kitta Hukkunna Allataala. Ri esso maaruwaé ripakangkani upacara pattutu'na, situru sibawa peraturang Hukkungngé.