NEHEMIA 6 - KITTA KAREBA MADECENG

Assikongkolokengngé lao ri Néhémia

¹ Sanbalat, Tobia, Gésyem sibawa sining balitta iya laingngé naéngkalingani makkedaé purani' pédécéngiwi témbo'é, sibawa sininna sebbo'na purani rilape', namuni iyaro wettué dé'pa tapasangngi tange'na ri pintu-pintu gerbanna kotaé.

² Nakiring undangang Sanbalat sibawa Gésyem lao ri iyya kuwammengngi upolé méwai sita mennang ri sala séddinna désaé ri Lompo Ono. Iyakiya uwissengngi makkedaé maéloi cilakaika.

³ Rimakkuwannanaro ukiringngi pappébalié lao ri mennang, “Dé' urapii lao nasaba mattengngakka pogau' jamang penting. Iyaro jama-jamangngé dé' natteru matu rékko usalaiwi untu' méwako sita.”

⁴ Narapi wékkaeppa mennang kiring undangang iya padaé lao ri iyya, na tungke'-tungke'to ubali iya padaé.

⁵ Ri mabbékkalimanana séddi ana' buwana Sanbalat polé sibawa mabbéré sure' tattimpa

⁶ iya lise'naé makkuwaé: “Napattongengngi Gésyem engkanna karéba-karéba ri yelle'na bangsa-bangsa ri seddé kuwaé, iya powadaéngngi makkedaé Saudara sibawa sininna tau Yahudié narancanai maronta, na iyanaro saba'na napédécéngiwi Saudara témbo kotaé. Napowada towi makkedaé maéloi Saudara makkai aléna mancaji arunna Yéhuda,

⁷ napurano jello siyagangngaré nabi untu' lanti'i Saudara ri Yérusalém. Iyaro karéba-karébaé pasti lettu matu ri arungngé. Rimakkuwannanaro, poléno untu' bicarai gau'éro.”

⁸ Iyakiya ukiringengngi pappébaliéwé, “Sininna iya napowadaé Saudararo dé' natongeng sibawa karéba bellé polé ri Saudara muto.”

⁹ Nacobani mennang péttauriki kuwammengngi naripappésau jama-jamangngéro. Massempajakka, “Oh Allataala, péwatangika!”

¹⁰ Iyatoro wettué, ulao ri bolana Sémaya ana' Délaya sibawa eppona Méhétabeel, nasaba engka halanganna lao ri iyya. Adanna lao ri iyya, “Laono mai tasipadduwa lao massubbu ri Bolana Puwangnge. Tacala'i sininna tange'na, saba' engka tau maélo mpunoko. Naullé iyaé wennié riyunoko matu.”

¹¹ Iyakiya mappébalika, “Iyya'é tenniya tau iya pojiyéngngi lari. Selaku tau biyasa dé' naweddikka muttamakiwi Bolana Puwangnge, matéka matu. Dé', dé' umaélo!”

¹² Purana utimbat-timbang gau'éro, mainge'na makkedaé angérangenna Sémayaro tenniya polé ri Allataala, sangadinna polé ri Tobia sibawa Sanbalat. Purani mennang nasogo Sémaya untu' palettu'i iyaro botoé lao ri iyya.

¹³ Akkattana mennang iyanaritu kuwammengngi umétau nauwaccowériwi tangngana angkanna pogau' dosa. Nanallalengiwi lolongengngi mennang kasempatang péjariwi asekku angkakku mancaji buwa témunna tauwé.

¹⁴ Massempajakka, “Oh Allataala, éngngerangngi aga iya napogau'é Tobia sibawa Sanbalatro. Hukkungngi mennang! Makkuwatoro nabi iya riyasengngé Noaja sibawa nabi-nabi laing iya maéloé péttaurika.”

Tépunnana témbo'é

¹⁵ Appédécéngenna témbo'éro manréi wettu 52 esso, natépuni ri tanggala duwappulo lima uleng Elul.

¹⁶ Wettunna naéngkalinga sining balitta ri yelle'na bangsa-bangsaé ri seddétaro, métauni mennang sibawa masiri, saba' naisseng maneng tauwé makkedaé iyaro jama-jamangngé ripogau'i sibawa pattulunna Allataala.

¹⁷ Na wettuéro sining pamimpinna Yahudié sikiring-kiringeng mupi sure' sibawa Tobia.

¹⁸ Maéga tau Yahudi massellao sibawa Tobia, nasaba ménéttunnai Sékhanya ana' Arah. Nainappani Yohanan, ana' Tobia, kawingngi sibawa ana' makkunrainna Mésulam ana' Bérékhya.

¹⁹ Namuni Tobia matteru-terui moki sure' lao ri iyya untu' péttaurika, iyakiya sining pamimpinna Yahudiéro nateppu-teppui ri yoloku akessingenna Tobia. Ri lainnaéro sininna iya upogau'é, nalaporo'i lao ri aléna.