NEHEMIA 12 - KITTA KAREBA MADECENG

Daftarna sining imangngé sibawa sining tau Léwié

¹ Iyanaé sining imangngé sibawa sining tau Léwi iya lisué polé ri appalirengngé silaong sibawa Zérubabél ana' Séaltiél silaong Imang Lompo Yésua:

^2-7 Sining imangngé: Séraya, Yérémia, Ezra, Amarya, Malukh, Hatus, Sékhanya, Réhum, Mérémot, Ido, Ginétoi, Abia, Miyamin, Maaja, Bilga, Sémaya, Yoyarib, Yédaya, Salu, Amok, Hilkia, sibawa Yédaya. Mennang iyanaritu imang-ngimang kapala ri wettunna Yésua.

⁸ Sining tau Léwié: Pamimpinna élong sukkuru'é: Yésua, Binui, Kadmiél, Sérébya, Yéhuda sibawa Matanya.

⁹ Anggotana pakkélong iya makkélongngé élong pappébali: Bakbuya, Uni sibawa sellao-sellaona siappang.

Wija-wijanna Imang Lompo Yésua

¹⁰ Iyanaé jori wijanna Imang Lompo Yésua: Yésua, Yoyakim, Elyasib, Yoyada,

¹¹ Yonatan, Yadua.

Sining imang kapalaé

^12-21 Iyanaé daftarna imang kapalaé sibawa appanna mennang wettunna Yoyakim majjama selaku Imang Lompo: Imang Appang Méraya Séraya Hananya Yérémia Mésulam Ezra Yohanan Amarya Yonatan Mélikhu Yusuf Sébanya Adna Harim Hélkai Mérayot Zakharia Ido Mésulam Gineton Zikhri Abia … Minyamin Piltai Moaja Samua Bilga Yonatan Sémaya Matnai Yoyarib Uzi Yédaya Kalai Salai Héber Amok Hasabya Hilkia Nétaneel Yédaya

Catatanna passalenna kaluwarga-kaluwarga imangngé sibawa sining tau Léwié

²² Daftarna passalenna kapala-kapala kaluwargana tau Léwié sibawa kaluwarga imangngé purani riyoki ri wettunna sining Imang Lompo mangoloéwé: Elyasib, Yoyada, Yohanan sibawa Yadua. Iyaro catatangngé tépuni wettunna mapparénta Darius selaku arung Persia.

²³ Iyakiya passalenna kaluwarga-kaluwarga appang Léwié banna riyokii lettu ri wettunna Yonatan eppona Elyasib.

Abbagéngeng jamangngé ri Bolana Puwangnge

²⁴ Ri yawa pappimpinna Hasabya, Sérébya, Yésua, Binui sibawa Kadmiél, sining tau Léwié ribagéi ri laleng kalompo-kalompo. Sises-siseng engka duwa kalompo iya majjamaé pojiwi Puwangnge sibawa sukkuru lao ri Aléna secara sibali-bali, situru sibawa peraturanna Arung Daud, atanna Allataalaro.

²⁵ Sining panganrowang pintu gerbang Bolana Puwangnge iya risuroé jagaiwi bili'-bili' bokongngé ri seddéna pintu gerbang Bolana Puwangnge iyanaritu: Matanya, Bakbukya, Obaja, Mésulam, Talmon sibawa Akub.

²⁶ Iyaro mennang tuwoi ri wettunna Yoyakim ana' Yésua sibawa eppona Yozadak sibawa ri wettunna Gubernur Néhémia sibawa Imang Ezra, ahli Hukkungngéro.

Narésmikanna Néhémia témbo'na kotaé

²⁷ Wettunna rirésmikang témbo'na kota Yérusalém, riyobbini sininna tau Léwié polé risininna onrong naonroiyé mennang, kuwammengngi naccowé ramé-raméiwi kajajiyangngéro sibawa élok-kélong sukkuru, sibawa nasibawang musi' gambusu sibawa kacapi.

²⁸ Namaddeppungenna sining pakkélongngé polé risining kaluwarga-kaluwarga Léwiéro, muwi polé ri daéra onrong naonroiyé ri seddéna Yérusalém, iyaé'ga polé ri kota-kota ri seddéna Nétofa,

²⁹ polé ri Bét-Gilgal, Géba sibawa Asmawét.

³⁰ Sining imangngé sibawa sining tau Léwiéro pogau'i upacara pappépaccingngé untu' aléna mennang nainappa untu' ra'ya'é, untu' pintu-pintu gerbangngé sibawa témbo kotaé.

³¹ Uwéllauwi sining pamimping Yéhudaé ménré ri tompo'na témbo'é untu' matoro'i duwa kalompo battowa iya mabbarisi'é matu mattulilingiwi kotaé nanakkélotto pappojiyang sukkuru lao ri Allataala. Kalompo mammulangngé mabbarisi'i ri tompo'na témbo'é, mattuju ri atau, ri Gerbang Warowoé.

³² Joppai Hosaya ri munrinna sining pakkélongngé, naccowéri sibagiyang polé risining pamimpinna tau Yéhudaé.

^33-35 Sining imang mangoloéwé joppai ri munrinna mennang nanaseppung towi tarompé'é: Azarya, Ezra, Mésulam, Yéhuda, Bényamin, Sémaya sibawa Yérémia. Riyaccowériwi mennang ri Zakharia ana' Yonatan sibawa eppona Sémaya. Siyagangngaré polé ri néné-nénéna iyanaritu: Matanya, Mikha, Zakur polé ri appang Asaf.

³⁶ Ri munrinna joppai anggota-anggota polé ri appanna, iyanaritu: Sémaya, Azareel, Milalai, Gilalai, Maai, Nétaneel, Yéhuda sibawa Hanani. Tiwi manengngi mennang paréwa musi', pada-pada sibawa iya nacculéyangngé Arung Daud, atanna Allataalaro. Imang Ezra, ahli Hukkunna Allataalaro, joppai ri ulunna barisi'éro.

³⁷ Lettu'na ri Pintu Gerbang Uwaié Jompié bélo'ni mennang sibawa tuppuiwi addénénna Kota Daud, naolai saorajana Daud, nainappa lisu ri témbo'é ri Pintu Gerbang Uwaié ri seddé alauna kotaé.

³⁸ Kalompo pakkélong iya séddiéssi mabbarisi'i ri tompo'na témbo'é mattuju ri abéyo, na iyya maccowériwi silaong sibagiyang polé ri ra'ya'é. Mabbarisi'ki molai Manara Addellangengngé lettu ri Témbo Masakkaé.

³⁹ Nainappaki molai Pintu Gerbang Efraim, Pintu Gerbang Malaungngé, Pintu Gerbang Balé, Manara Hananeel sibawa Manara Méa lettu ri Pintu Gerbang Bimbala'é. Barisi'ta mappésauwi ri seddéna Pintu Gerbang Anganrowangengngé ri seddéna Bolana Puwangnge.

⁴⁰ Nanalettu'na iya duwa kalompo pakkélongngéro ri seddéna Bolana Puwangnge. Ri lainnaé sining pamimpingngé ri laleng kalompo'ku,

⁴¹ maccowé towi sining imang iya masseppung tarompé'é. Mennang iyanaritu: Elyakim, Maaséya, Minyamin, Mikha, Elyoénai, Zakharia sibawa Hananya;

⁴² ri munrinna mennang joppai Maaséya, Sémaya, Eléazar, Uzi, Yohanan, Malkia, Elam sibawa Ezer. Sining pakkélongngé makkélongngi ri yawa pappimpinna Yizrahya.

⁴³ Iyaro essoé maéga akkarobangeng riyakkasuwiyangeng lao ri Puwangnge. Mariyo-riyoni ra'ya'é nasaba Allataala pura mébbui mennang masennang. Sining makkunraié sibawa ana'-ana'é maccowé towi mappésta, na saddanna mennang iya marennué riyéngkalingai lettu mabéla.

Sumbangeng tette'é untu' assompangngé ri Bolana Puwangnge

⁴⁴ Iyaro wettué siyagangngaré tau risuro jagaiwi bili'-bili' bokong onrong attarong sining sumbangengngé untu' Bolana Puwangnge, muttama'ni pakkasuwiyang tawa seppuloé sibawa wassélé mammulangngé tungke' taung. Iyaro sining pajagaé waji'i paddeppungengngi sining sumbangengngéro polé risining dare'é ri seddéna kotaé. Iyaro sining sumbangengngé nabbéréyangngi lao risining imangngé sibawa sining tau Léwié, situru sibawa peraturang Hukkungngé. Sining tau Yéhudaé pakarajai sining imangngé sibawa sining tau Léwiéro,

⁴⁵ nasaba mennang ritu pogau'i upacara pappépaccingngé sibawa upacara-upacara laing iya puraé napparéntang Allataala. Sining pacculé musi'é sibawa panganrowang pintu gerbang Bolana Puwangnge napogau' towi jama-jamanna mennang, situru sibawa peraturanna Arung Daud sibawa Salomo, ana' worowanéna.

⁴⁶ Sipongenna Arung Daud sibawa ahli musi' Asaf, sining pakkélongngé purani napuwélong élok-kélong pappojiyang sukkuru'é untu' Allataala.

⁴⁷ Ri wettunna Zérubabél sibawa wettunnato Néhémia, sininna ra'ya' Israélié mabbéréi pakkasuwiyang untu' paggenne'i apparelluwang esso-essona sining pakkélongngé sibawa panganrowang gerbang Bolana Puwangnge. Mabbéréi ra'ya'é pakkasuwiyang ripallaing lao risining tau Léwié na sining tau Léwié nawéréng towi sining imangngé bagiyang puraé ripattentu.