NEHEMIA 10 - KITTA KAREBA MADECENG

¹ Tau bunge' tékéngngéngngi iyanaritu Gubernur Néhémia ana' Hakhalya. Nainappa maccinrola Zédékia. Purairo sining tau mangoloéwé tékéng towi:

^2-8 Sining imangngé Séraya, Azarya, Yérémia, Pasyhur, Amarya, Malkia, Hatus, Sébanya, Malukh, Harim, Mérémot, Obaja, Daniél, Gineton, Barukh, Mésulam, Abia, Miyamin, Maazya, Bilgai sibawa Sémaya.

^9-13 Sining tau Léwié Yésua ana' Azanya, Binui wija-wijanna appang Hénadad, Kadmiél, Sébanya, Hodia, Kelita, Pélaya, Hanan, Mikha, Réhob, Hasabya, Zakur, Sérébya, Sébanya, Hodia, Bani sibawa Béninu.

^14-27 Sining pamimping bangsaé Paros, Pahat-Moab, Elam, Zatu, Bani, Buni, Azgad, Bébai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nébai, Magpias, Mésulam, Hézir, Mésezabeel, Zadok, Yadua, Pélaca, Hanan, Anaya, Hoséa, Hananya, Hasub, Halohes, Pilha, Sobék, Réhum, Hasabna, Maaséya, Ahia, Hanan, Anan, Malukh, Harim sibawa Baana.

Sure' Assijancing

²⁸ Idi, ra'ya' Israélié, sining imang tau Léwié, sining panganrowang gerbang Bolana Puwangnge, sining pacculé musi'é sibawa sining pajjamaé ri Bolana Puwangnge, makkuwatoro bainéta sibawa ana'-ana'ta iya battowaénna untu' majeppuiwi nenniya sininna tau iya turusiyéngngi hukkunna Allataala sibawa pura pallaingngi aléna polé ri tau laing iya monroé ri wanuwatta.

²⁹ Yaggabungeng manengngi aléta silaong sining pamimpitta sibawa mattanro untu' tuwo situru hukkunna Allataala iya puraé Nabbéréyang naolai Musa, atan-Na. Tennapodo natanroiki Allataala rékko dé' tarupaiwi iyaé assijancingngéwé. Mattanroki maélo mapatoiwi sininna paréntaé, hukkungngé sibawa peraturanna Puwangnge, Allataalata.

³⁰ Mattanroki untu' dé' takawing sicampuru sibawa bangsa-bangsa laing iya monroé ri wanuwatta.

³¹ Rékko engka bangsa laing maélo mabbalu gandong iyaré'ga muwi barang aga lao ri idi ri esso Saba'é iyaré'ga ri esso mapaccing laingngé, dé' tamaélo melliwi. Ri tungke' taung mapitué, dé' tamaélo jamai dare'é sibawa massinge inreng.

³² Tungke' taung massumbakki matu tungke'-tungke' lima gerang péra' untu' balancana Bolana Puwangnge.

³³ Maéloki passadiyangengngi sining apparelluwang assompangngé ri Bolana Puwangnge, iyanaritu: roti ripatala, pakkasuwiyang gandong esso-essoé, olokolo untu' akkarobangeng ritunu esso-essoé, pakkasuwiyang mapaccing laingngé, akkarobangeng-akkarobangeng paddampengeng dosana Israélié, sibawa sininna aga riyapparelluwangngé untu' Bolana Puwangnge.

³⁴ Idi, ra'ya'é, sining imangngé sibawa sining tau Léwié, mundiwi matu tungke' taung untu' pattentui appang niga iya harusu'é passadiya aju tunung untu' sining akkarobangeng pakkasuwiyangngé lao ri Puwang Allataalata, situru peraturang Hukkungngé.

³⁵ Tungke' taung ritiwii matu ri Bolana Puwangnge wassélé gandotta pammulangngé sibawa buwa-buwata iya bunge'-bunge' matasa'é risining ajukajutta.

³⁶ Ritiwii matu ana'-ana' worowanéta iya macowaé lao risining imangngé ri Bolana Puwangnge untu' mabbéréyangngi lao ri Allataala, situru sibawa peraturang Hukkungngé. Mabbéré tokki matu ana' saping, ana' bimbala iyaré'ga ana' bémbé'ta iya bunge' jajiyé.

³⁷ Ritiwii matu lao risining imangngé ri Bolana Puwangnge lama labbu polé ri gandongngé iya bunge' riyéngngalaé tungke' taung, makkuwatoro sining pakkasuwiyang laing maddupa anggoro'é, minnya zaitun sibawa sininna rupanna buwa-buwaé. Pakkasuwiyang tawa seppulo polé ri dare'ta ritiwii matu risining tau Léwi iya lélééngngi sining pakkasuwiyang tawa seppuloé ri kota-kota allaonrumangngé.

³⁸ Iyakiya séddié imang wija Harun harusu'i ranrengngi sining tau Léwiéro rékko naléléi mennang sining pakkasuwiyangngéro. Sibawa tawaseppulona polé risininna pakkasuwiyangngéro harusu'i natiwi sining tau Léwiéro risining bili' bokongngé ri Bolana Puwangnge.

³⁹ Ra'ya' Israélié sibawa sining tau Léwié harusu'i tiwi sumbangeng mattette maddupa gandong, anggoro sibawa minnya zaitun risining bili' bokongngé onronna taroi paréwa-paréwanna Bolana Puwangnge. Kuwatoniro onronna sining imang iya mattengngangngé majjama, sining panganrowang gerbang Bolana Puwangnge sibawa sining pakkélongngé. Dé' tajampaléllériwi matu parakaiwi Bolana Puwat-ta.