NEHEMIA 1 - KITTA KAREBA MADECENG

¹ Iyanaé laporanna Néhémia ana' Hakhalya passalenna jama-jamanna. Ri laleng uleng Kisléw ri taung maduwappuloé apparéntanna Artahsasta selaku arung ri Persia, iyya, Néhémia, engkaka ri Susan, ibukotana akkarungengngé.

Messéna Néhémia pikkiri'i Yérusalém

² Iyaro wettué, silessurekku Hanani, engkai polé ri Yéhuda silaong siyagangngaré tau. Nainappa utanai mennang passalenna keadaangngé ri Yérusalém sibawa sining tau Yahudié iya lisuénna polé ri appalirengngé ri Babél.

³ Nacuritani mennang makkedaé sining tau puraé ripali iya lisuénna ri tana assalennaro, tuwoni makkekkuwangngé manrasa-rasa sibawa ripakatuna ri bangsa-bangsa laingngé iya engkaé ri seddéna. Nainappani, témbo-témbo'na kota Yérusalém ancuru mupi tassiya-siya sibawa pintu-pintu gerbanna dé'pa naripédécéngi sipongenna ritunu ri wettu labe'é.

⁴ Uwéngkalingana karébaéro, tudanna sibawa teri. Siyagangngaré esso ittana masussa atikku. Matteruka mappuwasa umassempajatto lao ri Allataala,

⁵ “Oh Puwang Allataala makuwasaé ri surugaé. Idi Allataala Iya Marajaé namangoloki ri idi sibawa penno tau. Tette'ki matinulu sibawa makkatenningngi jancim-Mu lao ri tau iya méloriyék-Ko sibawa turusiyéngngi parénta-Mu.

⁶ Itaka oh Puwang, sibawa éngkalingai sempajang iya upaénré'é ri yolo-Mu esso sibawa wenni untu' umma Israél, ata-atam-Muro. Uwangakuiwi makkedaé idi, umma Israélié, madosani; iyya sibawa toriyoloku madosa toni.

⁷ Purani madoraka lao ri Iko sibawa majjalékkaiwi sining parénta-Mu. Dé' tapatoiwi hukkung-hukkung iya puraé Muwérékki naolai Musa, atam-Muro.

⁸ Oh Puwang, éngngerangngi ada-adam-Mu iya napowadaé Musa nasaba parénta-Mu, makkedaé rékko idi, umma Israélié, dé' namatinulu lao ri Iko, maélo-Ko passara-sarakki ri yelle'na bangsa-bangsa laingngé.

⁹ Iyakiya rékko lisuki paimeng ri Iko sibawa turusiwi sining parénta-Mu, idi iya tassiya-siyaénnaro Mupaddeppungekki matu paimeng, namuni engkaki ri cappa-cappa linoé. Nainappa Mupalisuki matu ri onrong iya puraé Mupilé untu' mancaji onrong massompa lao ri Iko.

¹⁰ Puwang, idi'é ata-atam-Mu, umma ri alé-Mu iya puraé Mupassalama sibawa akuwasang nenniya awatangem-Mu iya maseroé.

¹¹ Engkalingai sempajakku sibawa sempajanna sininna atam-Mu iya laingngé, iya maéloé pakalebbi-Ko. Abbéréyanni pattulum-Mu kuwammengngi na ri essoéwé iyaé atam-Mu naulléi lolongeng paressé babuwa polé ri arungngé.” Iyaro wettué pangurusu énungennaka arungngé.