MIKHA 4 - KITTA KAREBA MADECENG

Puwangnge paréntai linoé sibawa damé

¹ Ri esso-esso mangoloé bulu-bulu, onronna Bolana Puwangnge, tettong lempui matu sibawa maccaloli matanré naliwengngi sining bulué sibawa bulu-bulué. Mallompéngengngi sininna bangsaé lao kuwaro

² makkeda manengngi matu mennang, “Laono mai taénré ri bulu-buluna Puwangnge ri Bolana Allataalana Israélié! Nappagguruwangngi matu lao ri idi aga iya harusu'é tapogau'. Taccowériwi matu lalen-Na saba' pappagguruwanna Puwangnge poléi ri Yérusalém; Aléna mabbicarai polé ri Sion lao ri umma'-Na.”

³ Puwangnge pettuiwi matu parakaraé ri yelle'na bangsa-bangsaé, ri yelle'na sining wanuwa mawatangngé, iya mabélaé iyaré'ga macawé'é. Nalanroi matu mennang sining peddanna mancaji rakkala sibawa sining bessinna mennang mancaji piso pabbéle. Dé'na nasisullé sigasa bangsa-bangsaé, dé'to nasadiya-sadiya maélo mammusu.

⁴ Tungke' tauwé tuwoi matu amang sibawa saléwangeng ri tengngana palla anggoro'é sibawa palla aras-é; dé'gaga péttau-péttauriwi matu, iyanaro jancinna Puwang Iya Pommakuwsaé.

⁵ Tungke' bangsaé ri yasé'na linoé massompai sibawa mapatoi lao ri déwatana muto. Iyakiya idi mapatoki matu lao ri Puwang Allataalata sibawa sompai Aléna untu' mannennungeng.

Lisui matu Israélié polé ri appalirengngé

⁶ Makkedai Puwangnge, “Narapii matu wettunna Upaddeppungengngi sining tau iya Uhukkungngé, iyanaritu mennang iya manrasa-rasaé ri appalirengngé.

⁷ Purani mennang riképo sibawa mabéla polé ri kampong assalenna. Iyakiya, polé risining tau iya risésaéro maélo-Ka pammulaiwi séuwa assossoreng iya barué. Mancajiwi matu nennang bangsa iya battowaé sibawa mawatang. Uparéntai matu mennang ri Bulu-bulu Sion lettu mannennungeng.”

⁸ Na iko Yérusalém, onronna Allataala jagaiwi umma'-Na pada-pada pakkampié jagaiwi bimbala makkonronna, lisuko matu mancaji ibukotana akkarungemmu pada-pada pammulanna.

⁹ Magi muteri maladde-ladde? Magi mumapeddi pada-pada makkunrai iya maéloé mémmana? Aga nasaba dé' muwappunnai arung, sibawa maténi sining pappangajamu?

¹⁰ Eh pabbanuwana Yérusalém, agguliccino sibawa maranno pada-pada makkunrai iya mattengngangngé mémmana! Saba', harusu'i makkekkuwangngé musalai kotaé sibawa monro ri padangngé. Harusu'ko lao ri Babél, iyakiya napaleppe'ko matu Puwangnge kuwaro polé risining balimmu.

¹¹ Maéga bangsa pura maddeppungeng untu' gasako, éh Yérusalém! Makkedai mennang, “Harusu'i riyancuru Yérusalém! Maéloki mitai iyaro kotaé mancaji ruttungeng!”

¹² Iyakiya iyaro bangsa-bangsaé dé' naissengngi aga mattengngang narancana Puwangnge. Dé' namaingekiwi mennang makkedaé purani napaddeppungeng mennang untu' rihukkung, pada-pada gandong ripaddeppungengngé untu' rirése.

¹³ Makkedai Puwangnge, “Eh pabbanuwana Yérusalém, laono sibawa lé'ja'ni sining balimmu! Upancajiko matu mawatang pada-pada saping iya mattanru bessié sibawa makkanuku tembagaé. Muancuru'i matu maéga bangsa, sibawa asugireng iya nalolongengngé mennang polé ri wassélé arrampasakenna muwakkasuwiyangengngi matu lao ri Iyya, Puwan-na sininna alangngé.”

¹⁴ Eh pabbanuwana Yérusalém, éllauni sibawa masero kuwammengngi natulukko Puwangnge! Mattengngakki rikeppung! Mattengngangngi balié gasai pamimpinna Israélié!