MAZMUR 97 - KITTA KAREBA MADECENG

Allataala, panguwasa iya marajaé

¹ Puwangnge iyanaritu Arung! Sitinajai marennu linoé, sibawa pulo-puloé mariyo-riyo.

² Riyattulilingiwi ellung sibawa pettang; adélékengngé sibawa hukkungngé iyanaritu tettongenna apparéntan-Na.

³ Makkalolo apié ri yolo-Na, mangurengngi balié ri mattulilin-Na.

⁴ Billa'na tajangiwi linoé, ténré linoé mitai.

⁵ Maccolo sining bulué pada-pada lilingngé ri yolona Puwangnge, ri yolona Puwangnge, makuwasaéngngi sininna linoé.

⁶ Nabbirittangngi langié adéléken-Na, sibawa sininna bangsaé mitai alebbiren-Na.

⁷ Sininna tau iya sompaéngngi barahalaé ripakasirii matu, iya mabbangkakengngéngngi barab-barang dé'é nakkéguna; sinininna déwataé suju'i matu ri yolona Puwangnge.

⁸ Masennangngi pabbanuwana Sion sibawa kota-kotana Yéhuda wettunna naéngkalinga apettunna Puwangnge.

⁹ Saba' Iko, oh Puwang, panguwasana sininna linoé; maraja-Ko nacau sininna déwataé.

¹⁰ Eh iko iya pojiyéngngi Puwangnge, céccéi jaé! Saba' Puwangnge linrungiwi atuwonna umma'-Na, Napaleppe'i mennang polé ri akuwasan-Na tau madorakaé.

¹¹ Momponi tajangngé untu' tau iya malempué atinna, sibawa ariyo-riyong untu' tau iya malempué.

¹² Akkérennuno, éh sining tau iya malempu atié nasaba aga iya puraé napogau' Puwangnge, sibawa sukkuru'no lao ri Allataala iya mapaccingngé.