MAZMUR 91 - KITTA KAREBA MADECENG

Ri laleng linrungenna Allataala

¹ Tau iya mallinrungngé ri Iya Pommatanré, sibawa monro ri laleng accinaungenna Iya Pommakuwasaé,

² wedding makkeda lao ri Puwangnge, “Iko ritu pangéwaingekku sibawa pallinrukku, Allataalaku, ri alé-Mu ritu mateppe'ka.”

³ Napaleppe'ko matu polé ri abala tassubbué, sibawa polé ri lasa tiwié amaténg.

⁴ Nacinaungiko matu sibawa panni-Na, angkammu amang ri laleng accinaungen-Na; atinuluren-Na padai kaliyawo iya linrungiyékko.

⁵ Dé' naparelluko métau lao ri bahayaé ri wennié, iyaré'ga paggasa tennasenna-sennaé ri essoé;

⁶ lao ri abala iya polé ri wettu mapettangngé, iyaré'ga ancurukeng iya pageppaé ri tangassoé.

⁷ Muwi sisebbu tau maté ri seddému, sibawa seppulo sebbu ri seddé ataummu, iyakiya alému dé' namalo matu.

⁸ Rékko makkitako ri mattulilimmu, muwitai tau majaé nakenna pamale.

⁹ Saba' mupancajiwi Puwangnge pangéwaimmu, Iya Pommatanré mupancaji pallinrummu.

¹⁰ Nadé' nakennako matu abala, bolamu dé' matu nakennai abala.

¹¹ Allataala suroi malaéka'-Na jagaiko, untu' linrungiko kégi-kégiko lao.

¹² Naakkako matu ri pale' liman-Na, kuwammengngi aja' natabbuttu ajému ri batué.

¹³ Muwajjalékkaiwi matu ulaé sibawa singaé, muléjja'i singa loloé sibawa ula mamosoé.

¹⁴ Adanna Puwangnge, “Tau iya pojiyékko Upassalama'i matu, iya mangakuiyék-Ka Ulinrungiwi matu.

¹⁵ Rékko mangobbii lao ri Iyya, Ubaliwi matu. Ri wettu aperisengngé, Utulungngi matu; Upaleppe'i matu sibawa Uwéréng alebbireng.

¹⁶ Upésennangiwi matu sibawa umuru malampé, sibawa Upassamala'i.”