MAZMUR 9 - KITTA KAREBA MADECENG

Sempajang sukkuru nasaba adélékenna Puwangnge

¹ Untu' pamimping kor. Situru lagunna Mut-Laben. Mazmurna Daud.

² Nasibawang ati sukku maéloka sukkuru lao ri Iko, Puwang, sibawa mabbirittangngi winru-Mu iya mappabengngaé.

³ Maéloka marennu sibawa mariyo-riyo nasaba Iko sibawa pojiwi asem-Mu, Puwang Iya Pommatanré.

⁴ Ri yolo-Mu balé'i balikku nanalari; menrungngi mennang tabbuttu sibawa maté.

⁵ Saba' mapparénta-Ko selaku haking iya adélé'é; purani Mubéla parakaraku.

⁶ Purani Muhukkung bangsa-bangsaé sibawa paccappui sining tau majaé; riyallupaini mennang untu' mannennungeng.

⁷ Cappuni balitta ripallennye, kota-kotana mennang Muancuru'i; dé'na gaga iya méngngerangngéngngi.

⁸ Mapparéntai Puwangnge untu' mannennungeng; Napatettongngi akkarungen-Na untu' madélékiwi linoé.

⁹ Naparéntai bangsa-bangsaé sibawa adélé nenniya madélékiwi mennang sibawa malempu.

¹⁰ Iyaro Puwangnge onrong mallinrung untu' tau ritenre'é, onrong maccinaung ri wettu aperisengngé.

¹¹ Tau iya missengngék-Ko mamménasai ri Iko, oh Puwang, tau iya sompaék-Ko dé' Musalaiwi.

¹² Pojiwi Puwang iya mapparéntaé ri Sion! Curitanni pangkauken-Na lao ri bangsa-bangsaé!

¹³ Saba' maréngngerangngi lao ri tau iya manrasa-rasaé sibawa dé' nallupaiwi kelli'na mennang; Nahukkungngi tau iya pogau'é ateddekeng.

¹⁴ Itani, napanrasa-rasaka balié; amaséika, oh Puwang, paleppe'ka polé ri amaténgngé,

¹⁵ kuwammengngi upoji-Ko ri yolona pabbanuwana Yérusalém. Gora-goraka matu marennu nasaba Mupassalama'ka.

¹⁶ Bangsa-bangsa iya dé'é naissek-Ko sempé'i ri laleng kalebbong iya aléna muto kaliwi; tassiyoi mennang ri laleng siyona muto.

¹⁷ Purani nappannessang Aléna Puwangnge nasaba apettun-Na iya adélé'é. Tappasollai tau majaé ri pangkaukenna muto.

¹⁸ Amaténgngé iyanaritu paccappurenna sining tau majaé, bangsa-bangsa iya dé'é nabati-batiwi Allataala.

¹⁹ Dé' na untu' mannennungeng riyallupai tau kasiyasié; dé' na untu' matteru manrasa-rasai tauwé temmaddennuwang.

²⁰ Tokkonni, Puwang, adélékini bangsa-bangsaé, aja' Muleppessangngi bangsa-bangsaé mattempowangngi aléna.

²¹ Leppessangngi mennang mancaji métau, oh Puwang, sibawa maingekiwi makkedaé mennang bannai tolino.