MAZMUR 88 - KITTA KAREBA MADECENG

Sempajang méllau pattulung

¹ Elong. Mazmurna appang Korah. Untu' pamimping kor. Situru lagunna: Mahalat Léanot. Elong pappagguruwanna Héman, tau Ezrahié.

² Oh Puwang, Allataala iya passalama'ékka, ri essoé mangobbika lao ri Iko, ri wennié mangoloka ri Iko.

³ Tennapodo sempajakku lettu'i ri Iko, éngkalingai pangobbiku.

⁴ Nakennaka maéga asussang; engkani amaténgngé ri sumpangngé.

⁵ Pada-padaka tau iya maéloé nonno ri kalebbong amaténgngé, tau iya acappurengngé awatangeng.

⁶ Risalaika ri yelle'na tau maté, pada-pada tau riyunoé, léwu ri laleng kuburu'é, pada-pada tau iya Muwallupai sisengngénna, tau iya dé'énna Mutulungngi paimeng.

⁷ Muwaggenrungekka ri kalebbong iya maliyungngé, ri kalebbong kuburu iya maliyungngé sibawa mapettangngé.

⁸ Natenre'ka cai-Mu sibawa matane, ancuru'ka ritenre ri cai-Mu.

⁹ Mupabélaiwi sining sissekku polé ri aléku, sibawa Muwébbuka mappakaciddi-ciddi lao ri mennang. Riurukka nadé'na wedding massu,

¹⁰ mappido-pido matakku nasaba anrasa-rasang. Esso-essoka mangobbi lao ri Iko, Puwang, nenniya massempajang sibawa lima ritanréyang.

¹¹ Mébbu-Koga anu makalallaing untu' tau maté? Moto'ga mennang sibawa poji-Ko?

¹² Riyabbirittagga pammasé-Mu ri laleng kuburu'é, sibawa atinulurem-Mu ri onrong abinasangngé?

¹³ Engkaga missengngi anu makalallaim-Mu ri laleng pettangngé, iyaré'ga akessingem-Mu ri wanuwa onronna tau riyallupaiyé?

¹⁴ Iyakiya uwéllauwi pattulum-Mu, oh Puwang, tungke élé mappaénré'ka sempajang ri Iko.

¹⁵ Oh Puwang, magi Musampéyakka? Magi Mupagilingngi rupam-Mu polé ri aléku?

¹⁶ Mappammulai baiccu'ku manrasa-rasaka sibawa naincé amaténg, posoka tanggungngi pahukkungem-Mu.

¹⁷ Cai-Mu iya maseroé mancuru'ka; paggasa-Mu iya maseroé pabbinasaka.

¹⁸ Puppu esso cai-Mu pada-padai lémpe'é mattulilingika, keppukka polé ri sininna sulapa'é.

¹⁹ Sellao-sellaoku iya maréppé'é Mupabélaiwi polé ri aléku, pettangngé monro silaongekka.