MAZMUR 86 - KITTA KAREBA MADECENG

Sempajang méllau pattulung

¹ Sempajanna Daud. Engkalingai sempajakku, oh Puwang, sibawa balika, saba' kasiyasika sibawa malemma.

² Jagaiwi atuwokku, saba' Muwamaséika, passalama'i atam-Mu iya mateppe'é lao ri Iko.

³ Iko ritu Allataalaku, amaséika oh Puwang, saba' puppu essoka massempajang lao ri Iko.

⁴ Puwang, pérennuiwi atinna atam-Mu, saba' lao ri Iko upattuju atikku.

⁵ Makessikko, oh Puwang, sibawa mupoji maddampeng, tau iya massempajangngé lao ri Iko tette'i Muwamaséi sibawa pammasé iya maonaé.

⁶ Jampangiwi sempajakku, oh Puwang, éngkalingai pangobbiku méllau pattulung.

⁷ Ri wettu aperisengngé massempajakka lao ri Iko, saba' Mubalika.

⁸ Oh Puwang, dé'gaga puwang pada-padam-Mu, dé'gaga pogau'i aga iya Mupogau'é.

⁹ Sininna bangsa iya Mupancajiyé poléi matu, oh Puwang, untu' sompa-Ko sibawa pojiwi arajam-Mu.

¹⁰ Saba' poré-Ko sibawa pogau'i sining anu makalallaingngé, banna Iko ritu Allataala.

¹¹ Appagguruwanni élo-Mu lao ri iyya, oh Puwang, kuwammengngi uwaccowériwi sibawa matinulu; pancajika mateppe sibawa ati mallébu.

¹² Sukkuru'ka lao ri Iko sibawa sukku atikku, oh Puwang Allataalaku; maéloka pojiwi abattowangem-Mu mannennungeng.

¹³ Saba' tette'-Ko mamaséika sibawa pammasé iya battowaé; purani Mupaleppe nyawaku polé ri kalebbonna kuburu'é.

¹⁴ Oh Allataala, tokkongngi tau matempoé gasaka, sigarembolang tau mabecco maélo mpunoka; dé' mennang napaduli-Ko.

¹⁵ Iyakiya Iko, oh Puwang, Allataala mamasé sibawa pasayangngé, sabbara, penno pammasé sibawa matinulu.

¹⁶ Jampangika sibawa amaséika, péwatangika sibawa passalama'ka, saba' pada-pada indo'ku, massompa tokka lao ri Iko.

¹⁷ Wérékka tanrang akessingem-Mu, oh Puwang, kuwammengngi tau iya céccéékka namasiri, rékko naita-Ko mennang mattulung sibawa saléworika.