MAZMUR 83 - KITTA KAREBA MADECENG

Sempajang méllau pattulung méwai balié

¹ Mazmurna Asaf: séuwa élong.

² Oh Allataala, aja' Muwammekko, aja' tappalo-palo cikku sibawa monro mammekko.

³ Itani, balim-Mu maroca, maronta'i sining tau iya benciyék-Ko.

⁴ Mébbui mennang rancana maja untu' méwai umma'-Mu; sibawa barunding méwai sining tau iya Mulinrungiyé.

⁵ Adanna mennang, “Laono mai taancuru'i bangsa Israélié, kuwammengngi dé' nariyéngngeranna asenna mennang.”

⁶ Purani siyempe bangsa-bangsaé, sibawa masséddi méwa-Ko:

⁷ bangsa Edom sibawa Ismaél, sining tau Moab-é sibawa Hagar;

⁸ bangsa Gébal, Amon sibawa Amalé', bangsa Filistéa enrengngé pabbanuwana Tirus.

⁹ Makkuwatoro Asyur masséddini sibawa mennang, mancaji ana' buwana wija-wijanna Lot.

¹⁰ Gaukengngi mennang pada-pada tau Midiangngé, pada-pada Siséra sibawa Yabin ri Salo Kisyon,

¹¹ iya puraé ripaccappu ri Endor, sibawa mancaji pappakacommo untu' tanaé.

¹² Gaukengngi pamimpinna mennang pada-pada Oréb sibawa Zeeb, patunru'i pangakuwasana mennang pada-pada Zébah sibawa Salmuna,

¹³ nasaba purai mennang makkeda, “Laono mai tatudangiwi tana naonroiyé Allataala.”

¹⁴ Oh Allataala, assiyamporengngi mennang pada-pada awué, pada-pada daramé iya nairié anging.

¹⁵ Pada-pada api iya tunuéngngi ale'é, luwa api iya mangurengngéngngi sining bulué.

¹⁶ Lellungngi mennang sibawa anginraja-Mu, sélengiwi mennang sibawa talippuru-Mu.

¹⁷ Oh Puwang, leppessangngi mennang ripakatuna, kuwammengngi nangakuiwi mennang akuwasam-Mu.

¹⁸ Leppessangngi mennang tuli ripakasiri sibawa métau, leppessangngi mennang maté ri laleng atunangngé.

¹⁹ Tennapodo naissengngi mennang banna Iko ritu Iya Pommatanré, Puwang, iya makuwasaéngngi sininna linoé.