MAZMUR 8 - KITTA KAREBA MADECENG

Arajanna Allataala sibawa alempurenna tolinoé

¹ Untu' pamimping kor. Situru lagunna Gitit. Mazmurna Daud.

² Oh Puwang, Allataalata, tassebbo'i akuwasam-Mu ri sininna linoé! Arajam-Mu iya mariyasékiyéngngi langié

³ napuwélongngi ana'-ana'é sibawa ana'loloé. Apparéntam-Mu masse tenrigoyang untu' pammekkoi musué sibawa balié.

⁴ Rékko uwitai langi iya Mupancajiyé, kéteng sibawa sining wéttowing iya Mupakkennaé,

⁵ aga iyaro tolinoé, angkanna Muwéngngerangngi, niga aléna, angkanna Mupiyarai?

⁶ Iyakiya Muwakkai céddé pada sibawa Allataala, Mupassigera'i sibawa arajang nenniya alebbireng.

⁷ Muwéréngngi akuwasang ri yasé'na alangngé, sininna Mupancajiyé Mupatunru'i ri aléna:

⁸ bimbala, saping sibawa sininna olokolo'é, makkuwatoro olokolo'é ri padang makkale'-kale'é;

⁹ manu'-manu'é sibawa sining balé, sininna mahlu'é ri laleng tasi'é.

¹⁰ Oh Puwang, Puwatta, tassebbo'i arajam-Mu ri sininna linoé!