MAZMUR 74 - KITTA KAREBA MADECENG

Sempajang untu' amaradékanna bangsaé

¹ Elong pappagguruwanna Asaf. Oh Allataala, untu' mannennungegga Musalaiki? Magi Mumatteru macai lao ri umma'-Mu muto?

² Engngerangngi umma'-Mu iya Mupilé sipongenna riyolo, bangsa iya Mupaleppe'é kuwammengngi nancaji appunnangem-Mu. Engngerangngi matu Bulu Sion, iya Mupancajiyé onrong Muwonroiyé.

³ Jalajja'ni onrong iya mancajiyénna ruttungeng; sininna engkaé ri Bola-Mu purani naancuru balié.

⁴ Gora-gorai sining balim-Mu ri Bola-Mu, sibawa patettongngi bandéra apakalanna kuwaro.

⁵ Padai mennang pattubbang aju iya mabbettangngéngngi waséna, untu' tubbangngi aju-kajungngé ri ale'é.

⁶ Sininna sobbi ajué naancuru'i mennang sibawa waséna nenniya palu-palunna.

⁷ Natunui mennang Bola-Mu gangka cappu; sibawa panajisi'i onrom-Mu risompa.

⁸ Maéloi mennang patunru sisekki, sibawa tunui gangka cappu sininna onrong assompangngé ri wanuwaéwé.

⁹ Nabi-nabié sibawa tanra-tanrang makalallaingngé dé' napaitana, sibawa dé' muwi séddi tau missengngi gangka kégi matteru makkuwaé.

¹⁰ Gangka kégi oh Allataala, naéllé'-Ko balié balié? Lettu mannennungegga napakatunai mennang asem-Mu?

¹¹ Magi nadé'na Mutulukki? Magi mupaleppe'i limam-Mu polé ri idi?

¹² Ri pammulanna mupa Iko ritu arukku, oh Allataala, Iko ritu passalama'ki.

¹³ Nasibawang awatangeng iya maseroé Mupuwé'i tasi'é, sibawa reppa'i ulunna naga tasi'é.

¹⁴ Mureppo'i sining ulunna Léwiatan sibawa pancajiwi inanréna monroiyéngngi padang kessi'é.

¹⁵ Mupassolo'i mata uwai sibawa saloé; salo iya battowaé Mupancajiwi marakko.

¹⁶ Iko ritu pancajiwi essoé sibawa wennié, enrengngé pattentui onronna mata essoé sibawa kétengngé.

¹⁷ Mupattette'i pakkasésénna linoé, mébbui wettu timoé sibawa wettu bosié.

¹⁸ Engngerangngi pékkugi balié pakatuna-Ko, oh Puwang, bangsa iya dé'é naissek-Ko curupiyangiwi asem-Mu.

¹⁹ Aja' Muwabbéréyangngi umma'-Mu iya dé'é pakkullénna lao ri limanna bali iya mabecco'é. Aja' na untu' mannennungeng mallupaiwi totona umma'-Mu iya macilakaé.

²⁰ Engngerangngi assijancingeng iya Muwébbué sibawa idi, saba' napogau'i tauwé ateddekengngé ri tungke onrong makalemmengngé ri wanuwaéwé.

²¹ Aja' muleppessangngi tau ritenre'é ripakasiri, tennapodo tau manrasa-rasaé sibawa kasiyasié poji-Ko.

²² Tokkonni oh Allataala, éwaini parakara-Mu! Saba' puppu esso ripakatuna-Ko risining tau iya dé'é natepperi-Ko.

²³ Aja' Muwallupaiwi kelli'na sining balim-Mu, arukkanna sining balim-Mu iya pédé maladde'é!