MAZMUR 72 - KITTA KAREBA MADECENG

Sempajang untu' arungngé

¹ Polé ri Salomo. Oh Allataala, appagguruwangngi hukkum-Mu lao ri arungngé, wéréngngi adélékem-Mu lao ri ana' worowanéna arungngé.

² Tennapodo naadélékiwi umma'-Mu situru hukkungngé, sibawa gaukengngi tau ritenre'é sibawa adélé.

³ Memmuwaré wanuwatta macommo'i sibawa saléwangeng, sibawa engka adélékeng untu' sininna bangsaé.

⁴ Tennapodo arungngé nabélai ha'na ra'ya' mariyawaé, tulungngi sining tau kasiyasié sibawa paccappui sining tenre'éngngi mennang.

⁵ Tennapodo tette'i mattahang massossoreng ri wettu engkana mupa mata esso sibawa kéteng.

⁶ Tennapodo padai bosi iya teppaé ri padangngé, pada-pada bosi raja iya malle'éngngi sining dare'é.

⁷ Tennapodo mallebbangngi adélékengngé mannennungeng, sibawa maonai adécéngengngé ri wettu engkana mupa kéteng.

⁸ Malowangngi matu akkarungenna polé ri tasi'é lao ri tasi'é, mallebbangngi polé ri alau lettu ri yajang.

⁹ Tunru'i matu ri aléna pabbanuwana padang kessi'é sibawa suju'i balié ri yolona ajéna.

¹⁰ Arung-ngarunna Tarsis sibawa pulo-puloé tiwii matu pakkasuwiyang ri aléna. Arung-ngarung Arab-é sibawa Etiopia poléi tiwi pakkasuwiyang.

¹¹ Sininna arungngé suju'i matu ri yolona, sininna bangsaé mancajiwi ata-atanna.

¹² Saba' naleppessangngi tau dé'é pakkullénna ritenre, sibawa tau kasiyasi iya mangobbié ri aléna.

¹³ Namaséiwi tau kasiyasié sibawa ra'ya' mariyawaé, sibawa passalama'i atuwonna tau iya maperi senna'é.

¹⁴ Napaleppe'i mennang polé ri patenre'é sibawa ateddekengngé, saba' atuwonna mennang mangke senna'i ri aléna.

¹⁵ Tuwoi datu arungngé! Tennapodo lao ri aléna riyakkasuwiyangengngi ulaweng polé ri Arab. Tennapodo riyassempajangengngi tungke wettu sibawa tuli ribarakkakiwi.

¹⁶ Tennapodo maonai gandongngé ri sininna wanuwaé, sibawa sining bulu-buluna pennoi wassélé. Tennapodo macommo'i tanana pada-pada Buluna Libanon, sibawa pabbanuwana kotana tattambai pada-pada wellaé ri padangngé.

¹⁷ Tennapodo asenna arungngé risénge'i mannennungeng, sibawa ataromporenna tattambai ri wettu engkana mupa mata esso. Tennapodo bangsa-bangsaé méllauwi ribarakkaki pada-pada aléna, sibawa sininna tauwé teppui masennang.

¹⁸ Ripojiwi Puwangnge, Allataalana Israélié! Banna Aléna pogau'i gau'-gau' iya mappabengngaé.

¹⁹ Ripojiwi asen-Na iya marajaé mannennungeng; tennapodo sininna linoé pennoi sibawa alebbirem-Mu! Jajini makkuwaro. Aming!

²⁰ Sikumiro sempajanna Daud, ana' Isai.