MAZMUR 71 - KITTA KAREBA MADECENG

Sempajanna tau iya macowaénna

¹ Ri alé-Muka mallinrung, oh Puwang, aja' taleppessakka ripakasiri.

² Paleppe'ka, saba' adélé'-Ko, éngkalingai sibawa passalama'ka.

³ Ancajino ri aléku pada-pada bulu batué onrokku monro, iya magampangngé tuli urapi. Saba' purani Mupettui untu' passalama'ka, Iko ritu onrokku mallinrung sibawa maccinaung.

⁴ Oh Allataalaku, paleppe'ka polé ri tau majaé, polé ri akuwasanna sining tau mabecco'é sibawa mapéddaraé.

⁵ Saba' Iko ritu addennuwangekku, oh Puwang, Puwang, mateppe'ka ri Iko sipongeng maloloku.

⁶ Sipongeng tuwoku sanréka ri Iko; Mulinrungika sipongekku jaji natuli upoji-Ko.

⁷ Atuwokku mancaji contoi lao ri tau maégaé, saba' Iko ritu pallinrukku iya mawatangngé.

⁸ Tuli upoji-Ko, puppu esso uwabbirittang arajam-Mu.

⁹ Aja' Mubuwakka ri wettu macowaku aja' tasalaika rékko cappuni awatangekku,

¹⁰ saba' sining balikku nabicaraka, sining tau iya maéloé mpunoka sikongkolo'i.

¹¹ Adanna mennang, “Risalaini ri Allataala; laono mai talellungngi sibawa tatikkengngi, saba' dé'gaga passalama'i.”

¹² Aja' Mumabéla polé ri iyya, oh Allataala, Allataalaku, tulukka masitta.

¹³ Leppessangngi tau iya gasaékka ripakasiri sibawa ripallennye. Leppessangngi tau iya maéloé cilakaika alippuwang sibawa risalipuri atunang.

¹⁴ Iyakiya iyya tuli mamménasaka ri Iko, sibawa pédé maéga poji-Ko.

¹⁵ Puppu esso ucuritai matu sining pangkaukem-Mu iya adélé'é, sibawa asalamkeng polé ri Iko iya tenribilangngé.

¹⁶ Upojiwi pangkaukem-Mu iya barani, oh Puwang Allataala, upakalabbai adélékem-Mu, adélékem-Mu bawang.

¹⁷ Oh Allataala, Mupagguruka sipongeng maloloku, lettu makkekkuwangngé ucuritai winru-Mu iya mappabengngaé.

¹⁸ Oh Allataala, aja' tasalaika, lettu macowaka sibawa maubeng, kuwammengngi uwabbirittangngi akuwasammu sibawa abaraningem-Mu lao ri sininna assossoreng mangoloé.

¹⁹ Oh Allataala, sittanré langié adélékem-Mu; battowai sining pangkaukem-Mu; nigana mulléi pada-padai-Ko?

²⁰ Muwérékka maéga anrasa-rasang iya matane'é, iyakiya Mupalisui matu awatangekku sibawa paoto'ka polé ri kuburu'é.

²¹ Muwébbuka matu lebbi malebbi, sibawa saléworisika.

²² Maéloka poji-Ko sibawa gambusu, saba' matinulu-Ko, oh Allataalaku. Maéloka makkélongek-Ko pappojiyang sibawa kacapi. Oh Allataalana Israél iya mapaccingngé.

²³ Gora-goraka sibawa penno ariyo-riyong, nanakkélongeng tok-Ko pappojiyang. Tubu nyawaku makkélongngi sibawa marennu, saba' puraka Mupassalama.

²⁴ Puppu esso uwabbirittangngi matu adélékem-Mu, saba' sining tau iya maéloé cilakaika ricauni sibawa ripakasirini.