MAZMUR 70 - KITTA KAREBA MADECENG

Sempajang méllau pattulung

¹ Untu' pamimping kor. Polé ri Daud, ri wettunna makkasuwiyangeng akkarobangeng papparéngngerang.

² Oh Allataala, passalama'ka, Puwang, asitta'ni tulukka!

³ Leppessangngi tau iya macinnaé mpunoka ricau sibawa lari alippuwang. Leppessangngi tau iya gora-goraiyéngngi acilakakku ripasoro sibawa ripakatuna.

⁴ Leppessangngi tau iya cawa-cawaiyékka mancaji tasséleng sibawa masiri.

⁵ Tennapodo sininna tau iya sompaékko mariyo-riyo sibawa marennu; sibawa sininna iya méloriyéngngi asalamakeng polé ri Iko matterui makkeda, “Maraja tongeng ritu Puwangnge!”

⁶ Iyya'é kasiyasika sibawa malemma; poléni masitta, oh Allataala. Iko ritu pattulung sibawa pappassalama'ku, aja' tamatengnge, oh Puwang.