MAZMUR 7 - KITTA KAREBA MADECENG

Sempajang méllau adélékeng

¹ Watinna Daud, iya napuwélongngé untu' Puwangnge nasaba Kus, tau Bényamingngéro.

² Oh Puwang Allataalaku, mallinrukka ri Iko; passalama'ka sibawa leppessakka polé ri sininna tau iya lellungngékka.

³ Aja' narileppessang mennang pada-pada singaé luruika sibawa massarénréngekka na dé' gaga pattulukku.

^4-5 Puwang Allataalaku, ébara'na macéko-cékoka, kédo maja lao ri rangengngé, iyaré'ga naparogiwi balié temmakkéalasang, ébara'na upogau'i makkuwaéro,

⁶ leppessanna rilellung sibawa ritikkeng ri balié, nainappa riyuno sibawa risalai ri tanaé.

⁷ Tokkonni ri laleng cai-Mu, oh Puwang, éwani ajjallokenna sining balikku. Tokkonni untu' tulukka, saba' Mutuntu'i adélé'é.

⁸ Paddeppungenni bangsa-bangsaé ri mattulilim-Mu, sibawa akuwasaini mennang polé ri kadéra arajam-Mu ri surugaé.

⁹ Muadélékiwi rupa tauwé; wérékka adélékeng, oh Puwang, saba' dé' upasala.

¹⁰ Pappajani jana tau madorakaé sibawa pakkasse'i atinna tau makessingngé, saba' Iko Allataala iya adélé'é, iya mpellungiyéngngi atinna sibawa pikkiranna tolinoé.

¹¹ Pallinrukku iyanaritu Allataala iya passalama'éngngi tau iya malempu atié.

¹² Allataala iyanaritu Allataala iya adélé'é, iya hukkungngéngngi tungke wettu tau majaé.

^13-14 Rékko dé' natappinra kédo-kédona mennang, sadiyai sibawa senjata iya paunoé. Nasai peddanna sibawa napaggettengngi panana, nainappa nannémbakeng pana-panana iya makkéapié.

¹⁵ Itai, tau majaé narancanai majaé; mébbui rancana maja sibawa pogau'i pabengnguwangngé.

¹⁶ Kaliwi kalebbong untu' tau laingngé, iyakiya aléna muto sempé ri lalenna.

¹⁷ Jaji rihukkungngi ri jana muto, sibawa risissai ri ateddekenna muto.

¹⁸ Sukkuru'ka lao ri Puwangnge nasaba adélé'i, upuwélongengngi pappojiyang untu' Puwangnge, Iya Pommatanré.