MAZMUR 64 - KITTA KAREBA MADECENG

Sempajang méllau allinrungeng

¹ Untu' pamimping kor. Mazmurna Daud.

² Oh Allataala, éngkalingai sempajakku ri wettukku masussa, passalama'i nyawaku polé ri bali iya mappakatau-taué.

³ Linrungika polé ri assikongkolokenna tau madorakaé, polé ri rancana majana sining tau majaé.

⁴ Naébbui lilana mennang sittareng peddangngé, sibawa passu ada-ada mapéddara pada-pada panaé.

⁵ Polé ri assubbuwanna patassiyai mennang curita bellé, temmétau napétenna'i mennang tau teppasalaé.

⁶ Makkatenning masse'i mennang ri niya'na majaé, sibawa barunding maélo pasang siyo-siyo; nasengngi mennang dé' gaga mitai.

⁷ Narancanai mennang jaé, sibawa makkeda, “Mébbuki rancana iya macéko-céko senna'é.” Ati sibawa akkalenna tolinoé malamung senna, dé' riyulléi mpellungiwi.

⁸ Iyakiya Allataala mattémbakengngi pana-Na lao ri mennang, natennasenna-sennai maloi mennang.

⁹ Binasai mennang nasaba ada-adanna muto; sininna iya mitaéngngi mappaccilic-ciling ulu.

¹⁰ Nainappa sininna tauwé métau matu; napikkiri'i mennang pangkaukenna Allataala sibawa mabbirittangngi aga iya puraé napogau'.

¹¹ Nasininna tau makessingngé marennui matu nasaba aga iya napogau'é Puwangnge. Mallinrungngi matu mennang ri aléna; sininna tau malempué mabangka'i matu.