MAZMUR 62 - KITTA KAREBA MADECENG

Mateppe ri Allinrungenna Allataala

¹ Untu' pamimping kor. Situru: Yédutun. Mazmurna Daud.

² Nasibawang atennangeng nyawaku tajengngi Allataala, polé ri Aléna bawang asalamakekku.

³ Banna Aléna linrungika sibawa passalama'ka, Aléna pangéwaingekku, dé' matu ugoyang.

⁴ Gangka kégi manekko maélo gasai séddié tau iya pada-padaénna renring iya miringngénna sibawa témbo' iya mawé'énna maruttung?

⁵ Banna manniya'ko pasempé'i polé ri tudangenna iya matanré. Mupoji mabbellé; nasibawang témummu mabbarakka'ko, iyakiya ri laleng ati patanroiko.

⁶ Nasibawang atennangeng nyawaku tajengngi Allataala, polé ri Aléna bawang asalamakekku.

⁷ Banna Aléna linrungika sibawa passalama'ka; Aléna pangéwaingekku, dé' matu ugoyang.

⁸ Aléna ritu Allataala iya mpéréngngékka asalamakeng sibawa alebbireng, Aléna ritu pallinrukku sibawa pangéwaingekku iya mawatangngé.

⁹ Eh bangsaku, amménasako ri Allataala tungke wettu; loloni lise atimmu ri Aléna, saba' Aléna onrotta mallinrung.

¹⁰ Tolinoé banna siseppung nappase, baiccu battowa pada-padai dé' angke'na. Rékko ritimbangngi, annessana mennang maringengngi, lebbi ringengngi naiya siseppungngé nappase.

¹¹ Aja' muwaddennuwangiwi wassélé appassangngé, sibawa aja' muwattuwangngi barang rirappaé. Mala rékko tattambai asugiremmu, aja' naddeppé atimmu ri aléna.

¹² Wékkasiyagani uwéngkalinga Allataala makkeda makkedaé akuwasangngé assalennai poléi ri Aléna,

¹³ sibawa makkedaé tette'i mamasé. Iko, oh Puwang, mpale'i tungke tau situru pangkaukenna.