MAZMUR 60 - KITTA KAREBA MADECENG

Sempajang méllau pattulung

¹ Untu' pamimping kor. Situru lagunna: Bunga bakung assabbiyangngé. Mazmur pappagguruwang polé ri Daud,

² wettunna namusu tau Aram-Mésopotamiaé sibawa tau Aram-Zobaé, sibawa wettunna lisu Yoab caui 12.000 tau Edongngé ri Lompo Pejjé.

³ Musampéyakki, oh Allataala, sibawa leppessakki ricau. Macai-Ko lao ri idi; makkekkuwangngé passauki.

⁴ Mugottangngi linoé angkanna mallesse; pédécéngiwi iya reppa'-reppa'é saba' goyangngi linoé.

⁵ Muleppessangngi umma'-Mu péneddingiwi anrasa-rasang matane'é; tassulus-sulukki pada-pada tau mabo'é.

⁶ Muwéréngngi papparéngngerang sining tau mateppe'é, kuwammengngi naleppe mennang polé ri pahukkungengngé.

⁷ Passalama'ki nasaba akuwasam-Mu, baliwi sempajatta, kuwammengngi Naripassalama sining tau iya Muwamaséiyé.

⁸ Polé ri appéruman-Na iya mapaccingngé makkedai Allataala, “Maélo-Ka gora-gora sibawa tawa-tawai tana Sikhem; Uloteréiwi matu Lompo Sukot.

⁹ Giléad sibawa Manasyé iyanaritu appunnangek-Ku, Efraim palo-palo baja'-Ku, sibawa Yéhuda tekkeng akkarungek-Ku.

¹⁰ Iyakiya Moab iyanaritu onrong abbissang ajé-Ku; gora-gora pacau-Ka lao ri Filistéa. Lao ri Edom Uwaggenrungeng lapikajé-Ku selaku tanrang makkedaé appunnangek-Kui.”

¹¹ Niga maélo tiwika lao ri Edom? Niga dulukka lao ri kota mabbénténgngéro?

¹² Oh Allataala, dé'ga Muwaccowé sibawakki? Dé'ga Mumalluru silaongengngi tentarata?

¹³ Tulukki polé ri balié, saba' bantuwanna tolinoé dé' nakkéguna.

¹⁴ Silaong Allataala, baraniki taporé matu, Aléna ritu caui balitta.