MAZMUR 57 - KITTA KAREBA MADECENG

Sempajang méllau pattulung

¹ Untu' pamimping kor. Situru lagunna: Aja' tapaccappui. Mazmur polé ri Daud, wettunna lari muttama ri laleng gowaé untu' massalaiwi Saul.

² Amaséika, oh Allataala, amaséika, saba' ri alé-Muka mallinrung. Ri laleng accinaungen-Na pannimuka massubbu, narapi mappésau anginraja iya majjallo'é.

³ Mangobbika lao ri Allataala Iya Pommatanré, lao ri Allataala iya tinda'é untu' aléku.

⁴ Polé ri surugaé mappébaliwi sibawa passalama'ka; Nacaui sining tau iya tenre'ékka. Najjellokengngi matu Allataala makkedaé matinului lao ri iyya, sibawa tuli mamaséika.

⁵ Rikeppukka ri balié, pada-padai mennang singa pakkanré tauwé. Isinna mennang pada-padai bessié sibawa panaé, lilana mennang pada-padai peddang iya matarengngé.

⁶ Oh Allataala, ajjellokengngi arajam-Mu ri langié, sibawa alebbirem-Mu ri sininna linoé.

⁷ Napasangika siyo balikku, sibawa poloi sumange'ku. Kaliwi mennang kalebbong ri lalekku, iyakiya aléna muto sempé ri lalenna.

⁸ Mateppe'ka mattinetto, oh Allataala, mateppe'ka mattinetto, maéloka makkélong sibawa pojiko.

⁹ Eh péseddinno, nyawaku! Eh tokkonno, gambusu'é sibawa kacapié! Maéloka teddui éléé.

¹⁰ Puwang, maéloka sukkuru lao ri Iko ri yelle'na bangsa-bangsaé. Macinnaka makkélongek-Ko pappojiyang ri yelle'na rupa tauwé.

¹¹ Saba' battowa pammasé-Mu lettu ri langié, sibawa atinulurem-Mu lettu ri ellungngé.

¹² Oh Allataala, ajjellokengngi arajam-Mu ri langié, sibawa alebbirem-Mu ri sininna linoé.