MAZMUR 52 - KITTA KAREBA MADECENG

Pahukkungeng lao ri tau majaé

¹ Untu' pamimping kor. Elong pappagguruwanna Daud,

² wettunna Doég, tau Edongngé, polé paissengiwi Saul makkedaé lettu'ni Daud ri bolana Abimélékh.

³ Eh tau mawatang, magi muwattempaowangngi jamu lao ri tau iya riyamaséiyé ri Allataala?

⁴ Puppu esso mabbelléko sibawa rancanai majaé; padai piso cukkuru matarengngé lilamu.

⁵ Lebbi muwéloriwi jaé naiya makessingngé, lebbi mupojiwi mabbellé naiya makkeda tongengngé.

⁶ Nasibawang ada-adammu mabbelléko sibawa peddiriwi atinna tauwé!

⁷ Iyakiya ripabbinasako matu ri Allataala untu' mannennungeng; ritikkekko sibawa riyassarénréngeng polé ri bolamu, sibawa ripallennye polé ri linona tau tuwoé.

⁸ Naitanaro, métaui matu tau tongengngé, nainappa nacawa-cawaiko sibawa makkeda,

⁹ “Iyanaro taunna iya dé'é nallinrung ri Allataala, iyakiya mamménasangngi asugirenna maonaé sibawa sappa atennangeng ri barang rappana.”

¹⁰ Iyakiya iyya pada-padaka aju zaitun manyilaé ri laleng Bolana Allataala. Mateppe'ka makkedaé tette'i Allataala mamasé untu' mannennungeng.

¹¹ Tuli maéloka sukkuru lao ri alé-Mu ri yolona umma'-Mu uwabbirittangngi akessingem-Mu.