MAZMUR 5 - KITTA KAREBA MADECENG

Sempajang méllau allinrungeng

¹ Untu' pamimping kor. Nasibawang suling. Mazmurna Daud.

² Oh Puwang, éngkalingai ada-adakku, pénessaiwi addarékékku.

³ Jampangiwi pangobbiku sibawa tulukka, oh Arukku sibawa Allataalaku.

⁴ Saba' ri Iko massempajakka, oh Puwang, éngkalingai pangobbiku ri éléé. Maélé utiwi pakkasuwiyakku sibawa utajeng pappébalim-Mu, oh Puwang.

⁵ Iko Allataala iya dé'é napojiwi jaé; tau majaé dé' nawedding massurolellang ri Iko.

⁶ Dé' mutahang mitai tau matempoé, Mubenciwi tau iya pogau'éngngi majaé.

⁷ Mupaccappui sining tau iya pojiyéngngi mabbellé, Muwita mariyawai pabbelléngngé sibawa pabbunoé.

⁸ Iyakiya nasaba pammasé-Mu iya battowaé, weddikka muttama ri laleng Bola-Mu. Suju'ka mattuju ri Bola-Mu iya mapaccingngé, nenniya usompa-Ko sibawa mappakalebbi.

⁹ Oh Puwang, maéga senna balikku! Pimpikka untu' pogau'i élo-Mu, sibawa jello'i lalem-Mu iya harusu'é uwola.

¹⁰ Saba' ada-adanna balikku dé' nawedding riyatepperi; atinna mennang pennoi rancana maja. Ada-adanna mennang macenning pataré, iyakiya baténna mennang pennoi akebbongeng.

¹¹ Hukkungngi mennang, oh Allataala, leppessangngi mennang macilaka nasaba rancanana muto. Rukkai mennang nasaba maégani ritu dosana, saba' maronta'ni mennang lao ri Iko.

¹² Tennapodo sininna tau iya mallinrungngé ri Iko marennui sibawa gora-gora mannennungeng. Linrungiwi sining tau iya méloriyék-Ko, kuwammengngi namariyo-riyo nasaba Iko.

¹³ Saba' Mubarakkakiwi tau iya matinulué ri Iko, Mulinrungiwi mennang sibawa pammasé-Mu.