MAZMUR 49 - KITTA KAREBA MADECENG

Paracuma mattuwangngi asugirengngé

¹ Mazmurna appang Korah. Untu' pamimping kor.

² Engkalingai, éh sininna bangsaé, pattujui daucculimmu, éh pabbanuwana linoé,

³ muwi tau biyasaé, iyaré'ga tau mariyoloé, muwi tau kasiyasié, iyaré'ga tau sugié.

⁴ Maéloka powadai ada-ada mapanré, malamung senna buwa nawa-nawakku.

⁵ Maéloka puriyatiwi warékkadaé, sibawa pakatajangngi bettuwanna nanaggetti kacapito.

⁶ Dé' umétau ri wettu aperisengngé, wettukku rikeppung ri bali iya majaé.

⁷ Nattuwangngi mennanro asugirenna, sibawa mattempowangngi waramparanna.

⁸ Sitongenna dé' muwi séddi tau mulléi passalama'i silessurenna, iyaré'ga paleppe'i paccéra'na lao ri Allataala.

⁹ Muwi aga nabbéréyang dé'to nagenne matu; masuli senna ellinna paccéra nyawana,

¹⁰ kuwammengngi naleppe polé ri amaténgngé sibawa naulléi tuwo mannennungeng.

¹¹ Dé', naitai matu makkedaé muwi tau mapanré matéto. Tau madongoé sibawa madonggoé pada-padai binasa, nanasalaiwi waramparanna untu' tau laingngé.

¹² Monroi matu mennang ri kuburu'é mannennungeng; iyanaro onronna mennang untu' matteru, namuni riyolo mappunnai mennang maéga tana.

¹³ Tolinoé dé' naulléi tuwo matteru ri laleng asugirengngé; pada-pada olokolo'é, binasa towi matu.

¹⁴ Makkuwaniro totona tau iya mattuwangngéngngi aléna, sibawa wettu mangolona tau iya masennangngénna sibawa ada-adanna.

¹⁵ Pada-pada bimbala'é, ripattentui mennang untu' maté; mancajiwi matu amaténgngé pakkampina mennang. Maélé mennang ricau ri tau malempué; makebbongngi matu masitta tubunna mennang ri linona tau maté, mabéla polé ri onrong iya makessingngé.

¹⁶ Iyakiya Allataala paleppe'ka matu, Napaleppe'ka matu polé ri akuwasanna amaténgngé.

¹⁷ Aja' mumétau rékko séddié tau mancaji sugii, sibawa waramparanna tattamba maéga.

¹⁸ Saba' wettunna maté dé' aga-aga naullé tiwi, dé' matu nanonno waramparanna ri kuburu'é silaong aléna.

¹⁹ Mala rékko séddié tau maupe'i ri laleng atuwonna, sibawa ripoji-poji nasaba pallolongenna,

²⁰ naccinrolaiwi towi matu néné-nénéna ri onrong iya mapettangngé untu' mannennungeng.

²¹ Dé' naulléi tolinoé tuwo matteru ri laleng asugirengngé, pada-padai, binasa towi matu.