MAZMUR 47 - KITTA KAREBA MADECENG

Allataala Panguwasa Marajaé

¹ Mazmurna appang Korah. Untu' pamimping kor.

² Appaleppa'no sibawa marennu, éh sininna bangsaé! Pojiwi Allataala sibawa gora-gora!

³ Saba' Puwang Iya Pommatanré iyanaritu maseroi, Arung Maraja iya makuwasaiyéngngi sininna linoé.

⁴ Nawérékki apakalang lao ri bangsa-bangsaé, napancajiki panguwasa ri yasé'na suku-suku bangsaé.

⁵ Napiléngekki tana manata, abangkakenna bangsa iya Namaséiyé.

⁶ Naénrékini Allataala kadéra arajan-Na, naccowéri gora-gora sibawa oni sangkakala.

⁷ Puwélonni pappojiyangngé untu' Allataala, puwélonni pappojiyang untu' Arutta!

⁸ Allataala iyanaritu Arung ri sininna linoé, pojini Aléna sibawa élong penno agelloreng!

⁹ Tudangngi Allataala ri yasé'na kadéra arajan-Na iya mapaccingngé; Naparéntai bangsa-bangsaé.

¹⁰ Siyempe'i sining pamimpinna bangsa-bangsaé selaku umma'na Allataala nasompaé Abraham. Saba' Allataala iyanaritu Arunna sininna arungngé, maraja senna'i sibawa malebbi.