MAZMUR 41 - KITTA KAREBA MADECENG

Sempajang méllau ajjappang

¹ Untu' pamimping kor. Mazmurna Daud.

² Masennangngi tau iya jampangiyéngngi tau iya malemmaé; Puwangnge tulungngi matu ri wettu aperisengngé.

³ Puwangnge linrungiwi matu sibawa piyarai, Nasennangiwi matu ri linoé, sibawa dé' nabbéréyangngi lao ri balinna.

⁴ Dé' natulungngi matu Puwangnge ri wettunna malasa, sibawa palisui adisingenna.

⁵ Adakku, “Modosaka lao ri Iko, oh Puwang, amaséika sibawa pajjappaka.”

⁶ Napowadai balikku iya majaé passalekku, macinnai mennang kuwammengngi umaté sibawa riyallupai.

⁷ Sining tau iya célléngiyékka dé' namalempu. Napaddeppungengngi mennang karéba majaé passalekku, nainappa napatassiya lao kégi-kégi.

⁸ Sininna iya céccéékka mabbici-bici; napowadai mennang iya kaminang majaé passalekku.

⁹ Adanna mennang, “Maladde senna lasana, dé' nakkullé moto'na.”

¹⁰ Mala sellao maréppé'na iya kaminang uwatepperiyé, tau iya sisamaékka manré, pura pakatunaka.

¹¹ Amaséika oh Puwang, pajjappaka, kuwammengngi uwulléi mpale'i jana sining balikku.

¹² Rékko dé' naricauka ri balikku, uwissenni makkedaé Muwélorika.

¹³ Mutulukka nasaba alempurekku, sibawa mébbuka tuwo sibawak-Ko untu' mannennungeng.

¹⁴ Pojiwi Puwangnge, Allataalana Israél! Pojiwi Aléna makkekkuwangngé sibawa mannennungeng! Jajini makkuwaro. Amin!