MAZMUR 34 - KITTA KAREBA MADECENG

Pappojiyang lao ri akessingenna Puwangnge

¹ Mazmurna Daud, wettunna najjai maoja'-oja' ri yolona Ahimélékh, angkanna ripaddésu nalao.

² Maéloka sukkuru lao ri Puwangnge tungke wettu, sibawa mallanréseng pojiwi.

³ Maéloka sukkuru nasaba pangkaukenna Puwangnge; tennapodo tau ritenre'é naéngkalingai sibawa marennu.

⁴ Sibawakka pakarajai Puwangnge, laono mai tasibawa pakalebbii asen-Na.

⁵ Massempajakka lao ri Puwangnge, Namappébali, sibawa paleppe'ka polé ri sininna tauwé.

⁶ Tau ritenre'é maddennuwangngi ri Aléna sibawa marennu, dé' mennang nappunnai alasang untu' mancaji masiri.

⁷ Mangobbii tau macilakaé naribali ri Puwangnge, ripaleppe'i polé ri sininna aperisengngé.

⁸ Malaéka'na Puwangnge jagaiwi tau iya mateppe'é, sibawa paleppe'i mennang polé ri bahayaé.

⁹ Pérasai kalému pékkugi kessinna Puwangnge, masennangngi tau iya mallinrungngé ri Aléna.

¹⁰ Pakalebbii Puwangnge, éh iko umma'-Na, saba' tau mateppe'é dé' naakurangeng matu.

¹¹ Muwi sining singaé maluputo nasaba makurangngi anréna; iyakiya tau iya sompaéngngi Puwangnge dé' naakurangeng.

¹² Engkalingai, éh ana'-ana', upagguruko pakalebbii Puwangnge.

¹³ Macinnakoga malampé sunge sibawa péneddingiwi iya makessingngé?

¹⁴ Aja' mupassu ada-ada maja, sibawa aja' mupojiwi bellé.

¹⁵ Abélaiwi majaé, pogau'i iya makessingngé, usahakangngi assidaméngengngé sibawa maggangka ullé.

¹⁶ Najampangiwi Puwangnge tau malempué, maréngkalingai rékko kelli'i mennang méllau tulung.

¹⁷ Iyakiya tau iya pogau'éngngi majaé Naéwai; rékko matéi mennang, masitta'i mennang riyallupai.

¹⁸ Rékko mangobbii tau malempué, naéngkalingai Puwangnge, sibawa passalama'i mennang polé ri sininna aperisengngé.

¹⁹ Macawé Puwangnge ri tau iya marenni atié; Napassalama'i tau iya teddéngngé sumange'na.

²⁰ Maéga anrasa-rasanna tau makessingngé, iyakiya Puwangnge paleppe'i polé ri iya manenna.

²¹ Tette'i tubunna rijagai ri Puwangnge, polé ri bukunna dé' muwi séddi ripolo.

²² Tau majaé matéi nasaba jana, tau iya céccééngngi tau malempué rihukkungngi matu.

²³ Napassalama'i Puwangnge ata-atan-Na; iya mallinrungngé ri Aléna dé' narihukkung matu.