MAZMUR 30 - KITTA KAREBA MADECENG

Sempajang sukkuru

¹ Mazmurna Daud. Elong untu' résmikangngi Bolana Allataala.

² Upoji-Ki, Oh Puwang, saba' puraka Mupassalama sibawa dé' Muleppessangngi balikku gora-goraika.

³ Puwang Allataalaku, mangobbika ri iko méllau tulung, sibawa Mupajjappaka.

⁴ Mupaleppe'ka polé ri linona amaténgngé, sibawa patuwoka polé ri yelle'na sining tau maté.

⁵ Puwélonni pappoji-pojiyangngé untu' Puwangnge, éh umma'-Na iya matinulué, sibawa sukkuru'no lao ri Iya Pommapaccingngé.

⁶ Saba' cinampe'mi macai Puwangnge, akessingen-Na matterui sillampé atuwongngé. Terika ri wennié, iyakiya éléé tiwii arennung.

⁷ Wettunna marasa amang, makkedaka, “Dé' naricauka matu!”

⁸ Saba' mekessing ati-Ko lao ri iyya, oh Puwang, Mupancajika pada-pada bulu masse'é. Iyakiya rimunri massubbu-Ko polé ri iyya, naumancaji métau.

⁹ Ri Iko, oh Puwang, mangobbika, lao ri Puwangnge maréllauka,

¹⁰ “Aga akkégunana ri alé-Mu rékko matéka sibawa nonno ri kalebbong kuburu'é? Weddigga tau maté poji-Ko sibawa mabbirittangngi atinulurem-Mu?

¹¹ Engkalingai, oh Puwang, sibawa amaséika. Puwang tulukka!”

¹² Purani upinra mpatikku mancai séré-séré marennu, Muwalai amessékku na-Mupennoika sibawa ariyo-riyong.

¹³ Na dé' umaélo pammekkorengngi alé; upuwélongengngi pappojiyang alé-Mu, oh Puwang Allataalaku, sibawa sukkuru lao ri Iko untu' mannennungeng!