MAZMUR 2 - KITTA KAREBA MADECENG

Arung napilé Allataala

¹ Magi bangsa-bangsaé naébbu akacaungeng sibawa suku-suku bangsaé narancanai iya siya-siyaé?

² Massamangngi tokkong sining arung linoé sibawa sining panguwasaé masséddiwi méwai Puwangnge sibawa arung Napilé.

³ Makkedai sining panguwasaéro, “Laono mai tapoloi akuwasanna mennang sibawa sittaiwi amaradékatta!”

⁴ Macawai Puwangnge polé ri kadéra arajan-Na ri surugaé sibawa méllékéllé'i rancanana mennang.

⁵ Nainappa rigera' mennang sibawa macai, nenniya ripatasséleng sibawa cai-Na.

⁶ Adan-Na, “Ri Sion bulu-bulu-Ku iya mapaccingngé purani Ulanti arung upilé-Ku.”

⁷ Adanna arungngé, “Maéloka mappallebbangengngi aga iya puraé napattette Puwangnge. Adan-Na lao ri iyya, ‘Iko ana' worowané-Ku, iyaé essoé Umancaji Ambo'mu.

⁸ Ellauni, nasininna bangsaé Uwérékko, sibawa sininna linoé Upancajiwi appunnangemmu.

⁹ Mupoloi matu mennang sibawa tekkeng bessi sibawa mureppa'i pada-pada oring tanaé.’ ”

¹⁰ Jaji pénessaini, éh sining arungngé, éngngerangngi, éh sining panguwasa linoé!

¹¹ Assompano lao ri Puwangnge sibawa métau,

¹² suju'no ri yolo-Na sibawa ténré, aja' narapii mancaji macai Puwangnge naripaccappuko silalona, saba' malluwa'i cai-Na tennasenna-senna. Masennangngi tau iya mallinrungngé ri Puwangnge!