MAZMUR 145 - KITTA KAREBA MADECENG

Elong pappojiyang

¹ Pappojiyang polé ri Daud. Maéloka pakaraja-Ko, oh Allataalaku sibawa Arukku, sibawa poji-Ko mannennungeng.

² Esso-essoka maélo sukkuru lao ri Iko, sibawa pakalebbi-Ko mannennungeng.

³ Saba' marajai Puwangnge sibawa masero ripoji, aloppongen-Na dé' nariwellungi.

⁴ Massossorengngi napojiwi matu tauwé pangkaukem-Mu sibawa mabbirittangngi aporéngem-Mu.

⁵ Nabbirittangngi matu mennang arajam-Mu sibawa alebbirem-Mu, unennungngi matu winru-Mu iya mappabengngaé.

⁶ Nabbirittangngi matu mennang sining pangkaukem-Mu iya maseroé, arajam-Mu uwappallebbangengngi matu.

⁷ Nacuritai matu tauwé sininna akessingem-Mu sibawa makkélong passalenna adélékem-Mu.

⁸ Iyaro Puwangnge mamaséi sibawa makacuwa, matengnge macai sibawa tuli mamaséi.

⁹ Makacuwai lao ri tungke tau, sibawa mamaséiwi sininna Napancajiyé.

¹⁰ Sininna Mupancajiyé napoji-Ko matu, oh Puwang, sininna umma'-Mu sukkuru'i matu lao ri Iko.

¹¹ Napakarajai matu mennang akuwasam-Mu selaku Arung, sibawa curitai aporéngem-Mu,

¹² kuwammengngi sininna tauwé naissengngi pangkaukem-Mu iya battowaé, enrengngé akkarungem-Mu iya malebbié sibawa mattappaé.

¹³ Apparéntam-Mu tette'i sillampé wettué, akuwasam-Mu mattahangngi massossoreng. Matinului Puwangnge lao ri sininna jancin-Na, pennoi pammasé ri laleng sininna pangkauken-Na.

¹⁴ Natulungngi Puwangnge tau iya engkaé ri laleng asussang, Napatettongngi tau iya cuku'é.

¹⁵ Sininna mahlu' tuwoé naddennuwangi-Ko; Muwéréngngi inanré ri wettunna.

¹⁶ Mupennoiwi sininna apparelluwanna, angkanna dé' mennang naakurangeng.

¹⁷ adélé'i Puwangnge ri laleng sininna tindakan-Na sibawa pennoi pammasé ri laleng sininna pangkauken-Na.

¹⁸ Macawé'i lao ri tau iya mangobbié lao ri Aléna, sibawa méllauwi ri Aléna sibawa malempu atinna.

¹⁹ Napésennangiwi atinna sining tau iya mateppe'é; Naéngkalingai pangobbina sibawa passalama'i mennang.

²⁰ Nalinrungiwi tungke tau iya pojiyéngngi Aléna, iyakiya tau majaé Napaccappui.

²¹ Tuli maéloka pojiwi Puwangnge, tennapodo sininna mahlu'-Na napojiwi asenna Puwangnge untu' mannennungeng.