MAZMUR 144 - KITTA KAREBA MADECENG

Sukkuru'i arungngé lao ri Puwangnge nasaba apakalanna

¹ Polé ri Daud. Pojiwi Puwangnge pallinrukku! Nalatika mammusu, sibawa pagguruka mammusu.

² Aléna pattulung sibawa pangéwaingekku, pappassalama'ku onrokku maccinaung. Aléna pallinrukku, onrokku manyingkiri, Napatunru'i bangsa-bangsaé lao ri iyya.

³ Puwang, aga tolinoé angkanna Mujampangiwi? Niga aléna angkanna Mubati-batiwi?

⁴ Iyaro tolinoé padai siseppungngé anging, pada-pada wajo-wajo labe'é, makkuwaniro atuwonna.

⁵ Oh Puwang, timpa'i langi-Mu namupanonnoi, géssai sining bulué kuwammengngi namaddumpu.

⁶ Aggenrungengngi billa'-Mu kuwammengngi naripassara-sarang balié, leppessangngi pana-Mu kuwammengngi namétau mennang.

⁷ Loro'i limam-Mu polé ri surugaé, sibawa paleppe'ka polé ri lémpe'é. Passalama'ka polé ri akuwasanna tau laingngé

⁸ iya pojiyéngngi mabbellé sibawa pabengnguwang, sibawa mattanro bellé-bellé.

⁹ Uwakkélongek-Ko matu élong baru, oh Allataala, sibawa getti kacapi namakkélotto.

¹⁰ Muwéréngngi apakalang arung-ngarungngé, sibawa paleppe'i Daud atam-Mu.

¹¹ Paleppe'ka polé ri peddanna tau mabecco'é; passalama'ka polé ri akuwasanna tau laingngé iya pojiyéngngi mabbellé sibawa pabengnguwang, sibawa mattanro bellé-bellé.

¹² Tennapodo ana'-ana' worowanéta ri wettu malolona pada-pada tanet-taneng iya mancaji battowaé. Tennapodo ana'-ana' makkunraitta padai alliri magelloé, iya bélo-béloiyéngngi sining sunna saorajaé.

¹³ Tennapodo sining gudatta pennoi lise sibawa sininna rupanna wasséléna tanaé. Tennapodo sining bimbala'ta risining padatta makkéana'i narapi mappulo sebbu égana.

¹⁴ Tennapodo sining sapitta mabbija-bijai sibawa dé'gaga teddéng iyaré'ga alaungeng. Tennapodo dé' nariyéngkalinga kelli anrasa-rasangngé risining lalenna kotata.

¹⁵ Masennangngi bangsa makkuwaéro, masennangngi umma iya Allataalanaé Puwang!