MAZMUR 143 - KITTA KAREBA MADECENG

Sempajang méllau pattulung

¹ Mazmurna Daud. Oh Puwang, éngkalingai sempajakku, pénessaiwi paréllaukku. Balika nasaba atinulurem-Mu, tarimai sempajakku nasaba adélékem-Mu.

² Iyya'é atam-Mu, aja' taadélékika, saba' dé'gaga tau temmakkésalang ri yolo-Mu.

³ Purana nalellung balikku sibawa nacauka, sibawa naputtama'ka ri laleng tarungku iya makalemmengngé; mancajika pada-pada tau iya maittaénna maté.

⁴ Poloni sumange'ku, malippu senna'ni atikku.

⁵ Uwéngngerangngi esso-esso iya labe'é; upikkiri'i sininna pangkaukem-Mu, unennungngi sininna winru-Mu.

⁶ Massempajakka lao ri Iko sibawa lima mappale; pada-pada tana marakkoé, nauddaningi-Ko nyawaku.

⁷ Balika masitta, oh Puwang, saba' pettu paddennuwakka. Aja' tamassubbu polé ri aléku, kuwammengngi aja' upada-pada tau iya nonnoénna ri linona amaténgngé.

⁸ Paréngngerangika élé-élé pammasé-Mu, saba' ri alé-Muka mamménasa. Jellokekka laleng iya harusu'é uwola, saba' ri alé-Muka massempajang.

⁹ Poléka maélo mallinrung ri alé-Mu, oh Puwang, paleppe'ka polé risining balikku.

¹⁰ Pagguruka pogau'i élo-Mu, saba' Iko ritu Allataalaku. Makessing ati-Ko, sibawa mupimpikka matu ri laleng iya malappaé.

¹¹ Passalama'ka situru sibawa jancim-Mu, oh Puwang, nasaba akessingem-Mu, paleppe'ka polé ri aperisengngé.

¹² Nasaba pammasé-Mu paccappui sininna balikku, paccappui sininna tenre'ékka, saba' iyya atam-Mu.