MAZMUR 141 - KITTA KAREBA MADECENG

Sempajang wenni

¹ Mazmurna Daud. Mangobbika lao ri Iko, oh Puwang, tulukka masitta! Engkalingaka rékko mangobbika lao ri Iko.

² Tarimai sempajakku selaku pakkasuwiyang dupa, sibawa limakku iya maddeppa-reppaé selaku akkarobangeng wenni.

³ Oh Puwang, jagaiwi témukku sibawa jagaiwi iwéku.

⁴ Pabélaika polé ri pangéloreng pogau'éngngi majaé. Aja' taleppessakka masséddi sibawa tau madorakaé sibawa maccowé manré ri laleng péstana mennang.

⁵ Rékko séddié tau makessing mamparekka, nenniya naajara'ka sibawa malempu, iyaro pada-padai minnya iya kaminang makessingngé untu' aléku. Tennapodo dé' usampéyangngi, saba' matteruka massempajang méwai jana mennang.

⁶ Rékko sining panguwasana mennang ribuwangngi polé ri peppip-pepping batué, nangakuiwi matu mennang makkedaé tongengngi ada-adakku.

⁷ Nassiyamporengngi matu buku-bukutta ri wirinna kuburu'é pada-pada séddié batu riyancuru ri tanaé.

⁸ Iyakiya tette'ka maddennuwang lao ri Iko, oh Puwang Allataalaku, aja' taleppessakka maté, saba' mallinrukka ri Iko.

⁹ Linrungika polé ri siyo iya ritangiyékka, polé ri jebba'na sining tomajaéro.

¹⁰ Leppessangngi mennang sempé ri laleng siyona muto, iyakiya iyya tennapodo salama'ka.