MAZMUR 140 - KITTA KAREBA MADECENG

Sempajang méllau allinrungeng

¹ Untu' pamimping kor. Mazmurna Daud.

² Paleppe'ka polé ri tau majaé, oh Puwang, jagaika polé ri tau iya pogau'é ateddekeng.

³ Narancanai mennang jaé ri laleng ati, sibawa esso-esso paompo assasang.

⁴ Lilana mennang padai ula mamosoé, ada-adanna mennang padai racunna ula séndo'é.

⁵ Oh Puwang, linrungika polé ri akuwasanna tau majaé, jagaika polé ri tau iya pogau'é ateddekeng iya makkattaé untu' pasempé'ka.

⁶ Mammekko-mekkoi tau matempoé tangika siyo, sibawa pallebba jala untu' tikkekka. Puppu laleng mennang mattang jebba untu' jebba'ka.

⁷ Oh Puwang, makkedaka: Iko ritu Allataalaku, jampangiwi sempajang paréllaukku.

⁸ Puwang, Allataalaku, pappassalama'ku iya mawatangngé, puraka Mulinrungi ri laleng ammusureng.

⁹ Aja' Mutarimai paréllaunna tau majaé, oh Puwang, aja' taleppessangngi papolé wassélé rancanana mennang.

¹⁰ Aja' taleppessangngi balikku pacau; leppessanni ada-ada maja iya napowadaé mennang kennai aléna mennang iya pétenna'ékka.

¹¹ Leppessanni mennang nabosingi bara api, sibawa ribuwang ri laleng kalebbonna amaténgngé, angkanna dé'na naulléi massuna.

¹² Leppessanni tau iya pogau'é ateddekeng nakenna abala, aja' taleppessangngi pappétenna'é monroiwi linoé.

¹³ Uwisseng Muwéréngngi adélékeng tau ri tenre'é, sibawa méwaiwi parakarana tau kasiyasié.

¹⁴ Napoji-Ko matu tau malempué; monroi matu mennang silaongek-Ko.