MAZMUR 135 - KITTA KAREBA MADECENG

Elong pappojiyang

¹ Pojiwi Puwangnge! Pojiwi asenna Puwangnge, éh iko ata-atan-Na

² iya massompaé ri Bolana Puwangnge ri onronna Allataalata.

³ Pojiwi Puwangnge, saba' makessingngi, pojiwi asen-Na, masémpo atiwi. saba' makacuwai.

⁴ Napiléi Yakub untu' Aléna, umma Israélié napancajiwi appunnangen-Na.

⁵ Saba' uwissengngi battowa tongengngi Puwangnge, marajai napakacauriwi sininna déwataé.

⁶ Napogau'i aga iya Naéloriyé, ri langié sibawa ri linoé, ri tasi'é sibawa ri dolangeng iya maliyungngé.

⁷ Polé ri cappa linoé papoléi ellung, Naébbui billa'é untu' bosié. Nainappa Naparéntang angingngé kuwammengngi nassu polé ri onrong attaron-Na.

⁸ Ri Maséré Naunoi sininna ana' macowaé polé ri tolinoé iyaré'ga olokolo'é.

⁹ Naébbui kuwaro maéga anu makalallaing sibawa tanrang untu' hukkungngi arungngé sibawa sininna pegawénna.

¹⁰ Napaccappui maéga bangsa, sibawa mpunoi arung-ngarung poré:

¹¹ Sihon arunna Amori sibawa Og arunna Basan, enrengngé sininna arungngé ri Kanaan.

¹² Nainappa Nabbéréyang wanuwanna mennang mancaji appunnangenna Israélié, umma'-Na.

¹³ Oh Puwang, tette'-Ko matu riyabbirittang, sibawa asem-Mu riyéngngerangngi ri sininna assossorengngé,

¹⁴ saba' mabbéré-Ko adélékeng lao ri umma'-Mu, sibawa mamaséiwi ata-atam-Mu.

¹⁵ Barahalana mennang poléi ri ulawengngé sibawa péra'é, ébbu lima tolino.

¹⁶ Mappunnaiwi mennang bawa, iyakiya dé' naulléi mabbicara, mappunnaiwi mata, iyakiya dé' naulléi makkita.

¹⁷ Mappunnaiwi mennang daucculing, iyakiya dé' naulléi maréngkalinga, polé ri bawana dé' nassu nappase'é.

¹⁸ Tennapodo makkuwairo totona sining tau iya mébbuéngngi, sibawa mateppe'é lao ri aléna.

¹⁹ Pojiwi Puwangnge, éh umma Israélié, pojiwi Aléna, éh imang-ngimanna Allataala!

²⁰ Pojiwi Puwangnge, éh sining tau Léwié, pojiwi Aléna, iko maneng iya mateppe'é.

²¹ Pojiwi Puwangnge ri Sion, ri Yérusalém onrong Naonroiyé. Pojiwi Puwangnge!