MAZMUR 132 - KITTA KAREBA MADECENG

Pappojiyang untu' Bolana Puwangnge

¹ Elong ziyara. Oh Puwang, aréngngerakki lao ri Daud, sibawa sininna anrasa-rasanna.

² Aja' tallupaiwi assompanna lao ri Iko Puwang, jancinna lao ri Iko Iya Pommawatangngé, Allataalana Yakub.

^3-4 Adanna, “Dé' umaélo mappésau ri bolaku iyaré'ga matinro ri onrong atinrokku,

⁵ ri wettu dé'na upassadiya bola untu' Allataalana Yakub, onrong naonroi untu' Puwang Iya Pommawatangngé.”

⁶ Ri Bétléhém taéngkalingai passalenna Petti Assijancingngé, nainappa riruntu ri padang Yaar.

⁷ Laono mai talao ri onrong naonroiyé Puwangnge, sibawa sompai ri yolo-Na kadéra akkarungen-Na.

⁸ Poléni sibawa monro ri Bola-Mu, oh Puwang, silaong Petti Assijancingngé, lambanna akuwasam-Mu.

⁹ Tennapodo umma'-Mu gora marennu, sibawa sining imam-Mu tuli tuwoi situru élo-Mu.

¹⁰ Nasaba Daud, atam-Mu, aja' tasampéyangngi arung Mupilé.

¹¹ Purai mattanro Puwangnge lao ri Daud; dé' namaélo massakkarengngi jancin-Na. Adan-Na, “Séddi ana'mu Upancaji matu arung untu' mapparénta sulléiko.

¹² Rékko matinului ana'-ana'mu lao ri assijancik-Ku, sibawa turusiwi parénta-parénta-Ku, na untu' mannennungeng wijanna mennang sulléiko selaku arung.”

¹³ Saba' purai napilé Puwangnge Sion; nacinnaiwi untu' mancaji onrong Naonroiyé.

¹⁴ Adan-Na, “Kuwanié onrok-Ku untu' mannennungeng, macinnaka mapparénta ri onrongngéwé.

¹⁵ Sininna apparelluwanna Upennoiwi matu sibawa maona, sining taunna iya kasiyasié Uwéréngngi inanré gangka messo.

¹⁶ Imang-ngimanna nappaitangngi asalamakeng polé ri Iyya; makkélongngi matu umma'na sibawa gora marennu.

¹⁷ Kuwaé séddi wijanna Daud Upancaji arung; apparéntanna Upakkasse'i matu.

¹⁸ Akkarungenna tuli saléwangengngi matu, iyakiya sining balinna ripakasirii matu.”