MAZMUR 130 - KITTA KAREBA MADECENG

Sempajang ri laleng asussang

¹ Elong ziyara. Polé ri pepping asussangngé mangobbika lao ri Iko, oh Puwang.

² Puwang, éngkalingai pangobbiku, pénessaiwi paréllaukku.

³ Rékko matteru-Ko méngngerangngi dosata, oh Puwang, nigana mulléi tahang?

⁴ Iyakiya Mupoji maddampeng, kuwammengngi namancaji mateppe tauwé.

⁵ Utajengngi bantuwanna Puwangnge, uwamménasaiwi jancin-Na.

⁶ Uwuddaningiwi Puwangnge, lebbi naiya séddié paronda muddaningiwi éléé.

⁷ Addennuwakko lao ri Puwangnge, éh umma'-Na, saba' tette'i mamasé, sibawa tuli sadiya mappassalama.

⁸ Napaleppe'ki matu polé ri sininna asussatta.