MAZMUR 128 - KITTA KAREBA MADECENG

Barakka'na ruma tanggaé

¹ Elong ziyara. Masennangngi tau iya mateppe'é sibawa tuwo situru paréntana Allataala.

² Muwanréi matu wassélé jama-jamammu, tuwo madécéng sibawa saléwangeng.

³ Bainému padai pong anggoro iya macommo'é ri laleng bolamu. Ana'-ana'mu padai cura' pong zaitungngé ri mattulilinna méjammu.

⁴ Makkuwaniro Puwangnge barakkakiwi tau iya mateppe'é.

⁵ Tennapodo polé ri Sion nabarakkakiko Puwangnge. Tennapodo muwitai adécéngenna Yérusalém sillampé atuwommu!

⁶ Tennapodo malampé sunge'ko, sibawa mitai ana' eppomu! Tennapodo saléwangengngi umma'-Mu!