MAZMUR 125 - KITTA KAREBA MADECENG

Amang ri laleng allinrungenna Puwangnge

¹ Elong ziyara. Tau iya mateppe'é lao ri Puwangnge, iyanaritu pada-padai Bulu Sion iya masse'é tenripakédo, sibawa mattahang mannennungeng.

² Pada-pada sining bulué linrungiwi Yérusalém, makkuwaniro Puwangnge linrungiwi umma'-Na makkekkuwangngé sibawa mannennungeng.

³ Tau majaé dé' namatteru makuwasa ri tana manana tau malempué, kuwammengngi tau makessingngé dé' naccowé pogau'i majaé.

⁴ Oh Puwang, pogau'ni makessingngé lao ri tau makessingngé, lao ri tau iya malempu atié.

⁵ Iyakiya tau iya pogau'é macéko-céko memmuwaré rihukkungngi ri Puwangnge silaong tau majaé. Tennapodo saléwangengngi umma'-Mu!